Chapter Text
一開始，那份調任通知到手的時候，柳應廷其實是拒絕的。
呢個世界有種人，但求工時穩定，三餐溫飽，唔駛發達的，只要追得起蘋果新手機，偶爾也請得起女友食港女三層下午茶，開開心心，順順利利就夠。呢種人就係柳應廷，在這方面，柳應廷其實是特別赫夫柏夫的一個人，你說他不求上進也罷，沒有意義的晉升大可不必，若為了多那麼一丁點人工就要晚晚OT，他寧願賺少一點，至少放工返到屋企，仍可寫下歌、打下機、陪下女朋友。
不過有啲嘢就避無可避的，尤其正氣師部這種排排坐到時到候就要升你的政府機關。講真，若不是做個音樂人冇啖好食，柳應廷也不會無端端入了正苦。鬼叫正氣師部opening特別多，人工又抵得諗，咁啱得咁橋，柳應廷又真係meet晒啲requirement，咁就碌咗入去，咁就碌過了三年，咁就夠鐘，要進行豬隊友受洗儀式。
是咁的，正氣師部有個都市傳說，上頭夠鐘升你的時候，就會給你指派一個豬隊友，若你成功熬過了豬隊友的洗禮，就會升級做supervising rank。So far這個講法也是有根有據的，例如傳說中的陳卓賢，十八樓的楊樂文，和十九樓的邱士縉，這些佳麗分別熬過的豬隊友有——江𤒹生，江𤒹生和江𤒹生。
柳應廷低頭一瞥自己的調任通知——江𤒹生。
仆你個街。
柳應廷雙手掩面，寶寶委屈。
公道講句，話說豬隊友名單就不止是江𤒹生一人的，還有一人姓盧，一人姓陳，全名就唔開喇，前者上榜是因為極品港女，後者上榜是因為極品雷文克勞，說到底都是同一個罪名——好難觸摸。作為雷文克勞資深飼養員（指路廿三樓呂爵安），講真，柳應廷就覺得其實這兩人都還好，要是江𤒹生也是這麼個flow也就罷了，偏偏他不是。
江𤒹生是個葛萊芬多，說起來，和柳應廷還是同年的。他還在讀書的時候就是個問題兒童，較出名的事蹟，當數魁地奇場上毆鬥，上魔藥學炸了半個課室，玩dual club搞到對手斷手諸如此類的事。還有一無法考究的傳聞，說當年上占卜課，江𤒹生的水晶球裡面全都是黑霧，教授甚至話，她教了這麼多年的班，還真從沒見過這種彷彿跟修了成世黑魔法一樣自帶黑氣的學生。
柳應廷話就話和江𤒹生同年，除了在魁地奇球場上之外，卻尚未和他正面交過手。九十後嗰幾年學生特別多，柳應廷連自己學院裡的人都識唔晒，莫講話隔離出名聲大夾惡的葛萊芬多，只知自己在球場上守了四年的籠，食過江𤒹生唔少波餅。仔細一想，經歷過江氏洗禮的這三人，也沒有一個是赫夫柏夫的。
要攞notes，也只得向他比較相熟的大表哥求助。
「其實我覺得又唔駛咁擔心嘅，AK份人係就係衝動啲，但真係冇乜嘢㗎。」邱士縉安撫他道。
「係咪㗎⋯⋯」
柳應廷半信半疑，這兩人都是葛萊芬多的，邱士縉識了他這麼多年，莫不是早就慣了？
「每逢初十五十六都唔好激親佢，就冇嘢㗎喇。啊，同埋初十五晚會搵佢唔到。」
柳應廷吃了一驚，「吓？佢狼人嚟㗎？」
「呃，又唔係嘅⋯⋯」邱士縉支支吾吾。
「咁啫係屋企有狼人？」
邱士縉搖搖頭，「唉，人哋啲私人嘢我費事講，你到時問下佢睇下佢話唔話你知啦。」
「唔好啦，我真係唔想take up個assignment。」柳應廷扭計道。
「係AK問題定係點先？都係一年啫，好快過㗎咋。佢份人好單純㗎，肯定唔會陰你先啦，你唔好咁緊張啦。」
「唔係哩，呢個部門咁夜收，我實箍唔到煲啦！」
「哦～」邱士縉了然，「原來係有人俾人飛。」
冇錯就係咁。天意弄人，無獨有偶，年方廿九的柳應廷本打算三十歲前拉埋天窗，卻在收到調職信後不久，被拍拖五年的女友狠心飛了，原因很簡單，因為女方在婚後不想和奶奶住，而柳應廷無法妥協——柳應廷雙親都是麻瓜，本來和寶貝仔就已經是兩個世界的了，要是他還不和屋企人住，那真是完全無法維持關係的。
柳應廷說要箍煲，問心嗰句，也深知自己其實沒有多少勝算。
就正如此次調職，不調還須調，抗拒是無用的，只得接受命運。於是，柳應廷在兩個禮拜後，就準時到了黑魔法組織調查科報到——對，就是那個傳說中，有返工冇收工的黑魔法組織調查科。