Chapter Text
#1 有隻爵仔跌落水 • 3 小時前
第一次出post，可能有啲長。各位大佬多多包涵。
我知我1999，我盡力。
話説小弟俾武肺搞到無嘢撈，早排跟咗個friend做老臨，點知後尾連戲都無點開之後佢問我撈唔撈追星，errrr姐係尖叫兩舊、𦧲地加五舊嗰啲呢⋯⋯我心諗：吓，乜追星都有得撈嘅咩
Any肥，咁我就走咗去撈職業粉絲(我自稱) chur就唔算好chur，得閒去FC谷mon吓po ，立吓forum講咩做吓打手咁樣，出event影完飯拍俾幾張佢哋公司出圖。都算係老本行嘅，得閒又可以賣相打發吓時間，輕鬆～最緊要係可以竄出去扮有job，唔使俾我娘親𠹷啊嘛
追邊個唔講啦 ，費事自爆，求其叫佢KB啦。幾高嘅，花美男feel，唱得跳得，呃到妹妹仔㗎雖然我覺得我靚仔啲:p
星爺話臨時演員都係演員。所以我好認真對待哩份工，到KB開始有FC多咗fans，我肯定都有唔少功勞
你哋唔好屌我假粉住先其實後尾覺得哩個仔後生有活力啲歌又幾好聽咁，娘親同啊妹又日日喺屋企so i say i love you 洗我腦，我都已經算係fans嚟㗎喇。。。愛係唔需要著重於起因，只在乎結果係咪
#4 有隻爵仔跌落水 • 3 小時前
（啱啱去咗爆石SOR，繼續）
重點嚟喇，件事發生喺上一次出event嗰陣。
Btw無出event一段時間，KB又多咗fans (多謝我please
咁多咗妹豬fans嘅結果就係出event逼咗，係好L逼。等等吓前面有個女仔企高差啲跌落嚟，(好彩唔係美極，唔係小弟真係係咁先) 咁我紳士地想扶一扶佢，忽然隔離有對手又跟住扶喎⋯⋯
拿，利申我真係唔係cls手膠，但係隻手真係白到反光。。。白到我忍唔住𥄫多兩眼，然後我發現，WTF竟然係條仔嚟
唔好get錯我唔係精蟲上腦。
你哋知唔知出嚟追星成日一支公有幾悶！！！And作為全場唯一真雄性抬炮師，每次棟篤追谷時候我係幾咁異相
見到佢嗰刻我直頭想大叫知道自己找到了
係男飯啊ching條友望一望我，我當刻決定要say個hi建立吓革命情感，但我又忽然間load唔到開場白。
我：咦男飯哥，你都係鍾意KB㗎？
屌，問完我都覺自己on9，條問題真係智障過賀知章企響度唔係鍾意KB唔通鍾意朱咪咪咩
「哦係啊，唔好叫我男飯啦。我叫啊撈。」佢仲笑笑口(眼)咁應我，應該無覺得我kam掛？我哩刻先睇清佢個樣，雖然隔住口罩都唔清得去邊。小弟真係無圖又想救救老母，你哋試吓俾啲想像力先共咩啦西
條友笠頂cap帽又戴住黑口罩，露得對眼仔出嚟。瞳孔又好鬼黑喎，黑到我見到自己個樣cls。眼仔碌碌塊面又勁細⋯⋯其實我懷疑佢係咪貪平戴中童口罩 我最記得係佢對耳仔，大大隻成個佛祖咁。唔知係咪因為著到成身黑，啲皮膚望落仲撚白，超級白，白到掁眼。不過隔住個口罩我都feel到佢應該幾靚仔。條友真係人肉反光板嚟，我邊日出job帶埋佢去就啱晒。
Between，知唔知追星最谷鳩氣嘅係咩。就係永遠當你ready好晒嘅時候呢，個星係唔會出嚟㗎，而喺你鬆懈去吹水揸水飲水尿袋usb線一齊跌落水嗰吓(單押x4)，佢就會以迅雷不及掩耳之勢，衝出嚟撚你一個措手不及。
就喺我同啊撈準備嗲多兩句嗰陣，KB就出現喇。跟住啲妹豬就好似冧骨牌咁㧬埋嚟我哋呢邊。說好的安全社交距離呢ching？啊撈差啲成個人仆埋嚟，當堂一大浸香水味傳入我的鼻，係幾香嘅。我望一望佢，屌咁輕便嘅，摺凳都無張你齋企？
追星有三寶：大砲、梯、尿袋。驟眼睇，啊撈就⋯⋯
一樣都無嘅雖然我同啊撈就唔矮，我哋都係企第二行姐，但啲妹一上馬就遮鳩晒啦我見都影得七七八八、八八九九，又唔忍心佢睇背脊，我叫佢：不如你上去喇。
點知佢呆咁款望住我喎，我忍住屌9佢嘅衝動催佢快啲企上梯下一秒我終於知條友咪摩啲乜——搞唔掂條友騰雞到呢，企上去又驚跌又驚比人推又盛，最後我要兩隻手托住佢蘿柚推佢上去先掂。佢仲要搵我個頭嚟借力，摷到我個靚仔頭亂晒。我終於明俾人借力嚟抹嘢嘅窗係咩感受
個活動一完，條友落地個吓又差啲跌喇。一嘢撲埋嚟我惟有一嘢接住，跟住佢另個頭望住我講咗聲唔該。重點係我覺得佢特登電咗我一吓！個吓我大腦即刻lag咗，好似打機嗰陣望住對面一嘢大技轟落嚟，然後你無閃無技無金身焗住硬食一樣
不過佢攬住我嗰陣又真係好香，我又唔小心揸咗落佢屎忽度。嘩大佬我真係真係無心，嗰吓我仲心諗，WLTF大佬你姐手姐腳，出嚟追星真係67⋯⋯真係無半點非分之想，哥不是變態。
之後啊撈感激留涕咁款對住我講多謝你呀我好開心第一次睇到KB估唔到可以咁近blablabla⋯⋯
查實我無做過啲乜，係俾靚仔讚幾爽皮——可能我真係沾沾得太毫無保留，啊撈直頭打蛇隨棍上：
你影相影得咁靚，追星又咁叻不如下次一齊出event？
見到啊撈對眼瞇到月牙咁款，斯斯文文楚楚可憐又唔該又多謝咁禾大腦又hang機，一時忍唔住心軟咪應承ed，其實係有啲後悔ing⋯⋯
唔係煩要追星湊仔呀，我係燥自己，點解對住個陌生人可以咁dur皮，點解可以係咁二比人地個窗電兩電就失晒智
大佬人地口罩都未除你就乜都得咁，如果佢除罩之後係畑鹿驚*咁嘅樣咪玩完？好啦，就算係都未到幻滅嘅。同埋我又唔係要同佢拍拖，佢又唔會食我隻豬嘅無所謂啦。
思前想後我覺得，孖住個靚仔(疑似) 出嚟行都威啲啦係咪，咪當儲下RP囉。我又可以揾個伴排隊嗰陣互相照應吓。我知肯定係我湊仔多，當吹吓水都好吖。我哋一個英一個帥，可能分分鐘喺活動俾星探發掘一炮而紅呢 (想太多)
好快我就說服咗自己同啊撈一齊出event係利多於弊，應該。
於是我俾咗TG佢，等佢搵我。點知番到屋企洗完白白食埋飯放低埋幾兩，佢都無揾我。。。其實我都唔知自己囉囉攣乜鳩明明係甩難嘅節奏，但又有啲心有不甘咁。可能最尾佢都係覺得我太柒所以算數。。。我心靈受到了1萬點傷害
到最後，揾我嘅唔係啊撈，而係我個friend。
『你唔使再出Event同做打手喇。』
『吓？我做錯咗嘢？』
『唔係，其實係因為KB而家都夠紅，所以公司話唔使再搵人扮fans喇。』
我呆咗一吓，跟住又收到個msg。
今次係啊撈send嚟嘅，但我已經沉醉係失業嘅悵惘入面開心唔嚟。
『下下個禮拜有首映禮活動不如一齊去？』
Errrr咁我而家仲出唔出event好？
#3 山下一群羊 • 2 小時前
ching你個post 出咗響感情台你知㗎可
LM等睇變甜故
#4 十八區都係巨龍 • 2 小時前
追星都有錢賺咁筍 樓主求介紹
姜B我OK架喎。
#5 碌蔗掂過碌蔗 • 1 小時前
姜B咁多囡囡fans
一個都睇唔中你知咩料啦
#6 有隻爵仔跌落水 • 1 小時前
我有話我追姜B咩。。。
仲有我問你哋出唔出event好
個個九唔搭八乜料啊
#7 碌蔗掂過碌蔗 • 1 小時前
唔出就雙失青年 出有機會財色兼收
自己諗
#8 山下一群羊 • 37 分鐘前
樓上男人老狗扮乜鬼女人
樓主幫緊你幫緊你
上呀！
#10 日日都係夜晚 • 12 分鐘前
樓主你第一日就揸人蘿友仲有咩好講