Work Text:
晚飯時段，呂爵安坐在佈滿古早風裝潢的台式餐廳裏，等待着盧瀚霆下班過來一起進餐。
無聊地滑着手機打發時間時，剛好偷聽到鄰座一男一女的對話。
「你係我第一個鐘意嘅人，幾多分唔緊要，我淨係想知 yes 定 no 。」
「 Sorry… 」
「係因為年紀定身份？」
「係 timing 。」
「咩 timing 呀？係咪只要我唔係到讀書就得？如果係咁我退學囉。」
「唔關事架，你而家個世界太細，等你遇到一齊成長同進步嘅人，你先會知道咩叫真正嘅鐘意。」
聽到貌似是表白失敗的有趣對話，一向八卦的呂爵安當然立刻側耳細聽箇中內容，還偷偷的瞄過去窺視一下當事人的表情面貌，實行看一場視聽同步的好戲。
側目看去，只見那是一個身穿校服的男學生，和一個衣着端莊的成熟女生，從表面推斷，應該是老師和學生的關係。
唔係嘛？溝 miss ？師生戀咁爆？！
如此爆炸性的發現讓呂爵安的興趣瞬間大增，於是便更落力的整個人靠過去窺聽。正聽得起勁時，背後突然被大力拍打了一下，嚇得他整個人從椅上彈了起來。
「呂爵安你搞咩呀？」
轉過頭去，映入眼簾的正是自家寶貝盧瀚霆，頓時鬆了口氣後緩緩坐下。
「呼 … 撈豬你咁大力打落黎嚇死我啦。」呂爵安用手撫着心口大力深呼吸了幾下以平復心情。
「係我俾你嚇死就真呀，突然間成個人跳起，差 d 俾你撞到啦。」盧瀚霆撇了撇嘴。
「啊～對唔住呀，我唔係有心架，錫番你啦。」說罷呂爵安便嘟着嘴巴靠過去盧瀚霆面前，手也沒閒着，貼上了對方的心口輕撫。
「喂呀你個變態佬咪乘機抽我水呀。」盧瀚霆微微欠過身掙開呂爵安的咸豬手。「快 d 叫嘢食啦，我好肚餓呀。」
「遵命即叫！唔可以餓親我嘅撈撈豬。」呂爵安做了個敬禮手勢，然後便埋首查看餐牌，熟練的挑選着盧瀚霆愛吃的餐點。
雖然這只是很簡單的一句話和再平凡不過的舉動，卻足夠令盧瀚霆感到窩心，隨即泛起了心甜的笑容。
喚來待應點餐後，呂爵安邊清潔着餐具邊壓低聲線向盧瀚霆匯報剛才收集得來的八卦。
「講 d 嘢你知呀，頭先等你個時呢，我偷聽到隔離枱個男仔表白呀，一望過去先發現原來係學生同 miss 黎架，幾震撼呀，真係估唔到而家 d 師生關係咁開放。」呂爵安如三姑六婆上身般七情上面的說着事非。
「乜你偷聽人講嘢咁冇禮貌架。」盧瀚霆雖然嘴上在嫌棄呂爵安，但表情卻是被逗樂的笑着，下意識的也瞄了一眼鄰桌的師生。
「咁唔覺意聽到姐～不過我仲聽到個男仔話今次係佢第一次鐘意人，嘩初戀就越級挑戰打大佬追 miss 喎，而家 d 學生哥真係犀利，我做學生個時都淨係識玩暗戀炸。」呂爵安依舊自顧自地說得興高采烈。
對着這個比女生還愛管閒事的戀人，盧瀚霆真的拿他沒轍，沒好氣的反了一下白眼。
「係喎撈豬，你好似從來都冇同我講過我係咪你第一個鐘意嘅人喎？」呂爵安忽然將話風一轉，把話題帶到兩人身上。
「唔係呀。」盧瀚霆下意識很順口的回應。
「吓 … 」聽到他的回答，呂爵安心裏閃過一絲失落，「咁你同過幾多人一齊呀 … 」
盧瀚霆側起頭認真的想了想，「唔記得啦，幾個瓜 … 」說出來後，眼角餘光瞥見呂爵安的臉色開始變得灰暗，連忙接續說道：「不過之前同過幾多人一齊都唔重要呀，最重要係而家同我一齊果個係你阿嘛，而且要經歷過失敗嘅感情，我先可以成長，先可以變得更加好同更加識得點樣去愛你，係咪？」
盧瀚霆帶笑的看向呂爵安，輕輕捏了一下他的臉頰。
嗯，又好像有道理。
如果沒有經歷過那些煎熬的過往，就不會蛻變成今時今日的自己，是因為有過歷練，才會成就了現在的我們，才能迎來相愛最好的時辰。
聽到盧瀚霆的回答，呂爵安勾起稱心滿意的笑容。
「咁又係喎，撈豬好叻！」輕輕在盧瀚霆的臉上落下一吻後，忽然又想到另一個問題。「咦但係點解咁耐以黎你都唔問我係咪你第一個男朋友嘅？」
「點解要問呀？」盧瀚霆又很自然的脫口而出。
「咁 … 你唔會想知道我以前嘅嘢咩？」以為盧瀚霆並不在乎自己的過去，呂爵安不期然感到有點落寞，語氣中帶了點苦澀。
「傻佬我點會唔想知呀～只係無論我係咪第一個都好，而家呢一刻我就係唯一一個，將來你都只會得我一個男朋友，呢一世都會係我同你一齊，永遠都唔會變就得啦。」盧瀚霆摸了摸呂爵安的順毛瀏海，輕柔地安撫着這個扭計的大細路。
是不是第一個並不重要，最重要的，是我們都是彼此的唯一也是最後一個。
聽到自家戀人連續的甜言蜜語，呂爵安被氹得心花怒放，內心泛起陣陣的暖意和感動，開懷的笑了起來，還笑到看得見牙肉。
「撈豬幾時變到咁叻咁識冧人架？今次輸俾你添。」呂爵安的眼內滿是愛意和讚賞。
「我男朋友教我嘅。」盧瀚霆朝呂爵安眨了下眼，狡黠的笑了笑。
「幾時都話撈豬係最扺錫！」說罷便大力吻上了盧瀚霆的唇，想把內心的欣喜和愛慕傳達給他。
盧瀚霆也大方的回應着呂爵安的熱吻。
兩人熱切的互相追吻着，直到待應走過來上菜，才依依不捨的從彼此唇上拉開，但依然是隔着頭貼頭的咫尺距離，深情的凝望住對方。
有情飲水飽，看着眼前最愛的人，呂爵安和盧瀚霆彷彿都忘了什麼是餓，良久以後才開始動手進餐。
「好啦，快 d 食嘢先啦，食完我地一齊番屋企。」呂爵安把一顆花枝丸夾到對方碗內。
「好呀。」盧瀚霆接過後隨即暢吃起來，然後禮尚往來的把一件鹽酥雞夾給呂爵安。
兩人由分夾食物，漸變成你一口我一口的相互餵食，邊吃邊繼續談天說地，享受着這溫馨幸福的晚飯時刻。
這一夜還是一如既往的甜蜜靜好。
End.