Work Text:
個日呂爵安係法院出嚟，一堆記者即刻湧上前，隊支咪埋嚟七嘴八舌咁問咗一堆佢根本聽唔清嘅問題。
柳應廷係其中一個。呂爵安之所以一眼就注意到佢，係因為佢件花恤衫同唇上個兩撇鬚真係⋯⋯好醜。
佢揚起燦爛嘅笑容，同以往一樣用一句說話回應哂所有問題，「個case已經進入咗法律程序 ，我唔係咁方便評論。」
佢輕輕推開人群向佢架車走去，司機已經hold住車門等佢。呢個時候柳應廷一個箭步衝上前，捉實司機想要閂埋嘅車門，「呂大狀，你打算點樣為被告打甩誹謗罪？原告好多都係權貴嚟——」
呂爵安抬起一邊眉毛，係嘈過街市嘅呼喝之間聽到一把咁溫婉嘅聲有啲意外。佢捉住柳應廷嘅手腕，係眾目睽睽之下笑住講：「你上車我慢慢話你知囉——」
柳應廷都未反應得切就比人拉咗上車，車門一閂隔絕咗出面嘅吵鬧，佢先後知後覺咁發現自己上咗陌生人架車。
不過當下最緊要都係喺呢個嬉皮笑臉嘅大狀口中挖到料出嚟，「呂大狀？」
呂爵安望住佢瞪圓嘅雙眼，一臉義正嚴辭嘅神情同佢個兩撇鬚、花恤衫同把靚聲真係十萬個違和。
勉強蒙頭入閘都唔係唔得嘅⋯⋯鬼叫佢對靚聲情有獨鍾咩。呂爵安已經開始諗緊今晚想對佢做嘅嘢，淨係聽住把聲叫Edan叫到不要不要咁都夠做啦。
但表面上佢懶係正經咁答：「你同我去個cocktail party我咩都可以答你，當然except those I’m not at liberty to say。」
呂爵安就係衣冠禽獸嘅化身，佢唔會否認。
柳應廷一臉驚恐，「party？咩party？」
「依家去醫飽個肚先，我仲未食lunch。」
呂爵安望住柳應廷狼吞虎嚥咁將個焗薯鯨吞，忍唔住問：「喂，你幾日無食嘢定點？」
柳應廷有啲怕醜咁拎起紙巾抹嘴，「咁，做記者不嬲都搵得唔多㗎啦⋯⋯」佢唔算係三餐不繼，不過成日OT已經慣咗杯麵三文治解決，況且佢都唔知幾多年無嚟過啲咁貴嘅餐廳⋯⋯
呂爵安皺眉，「咁你仲做？」
「吓？咁⋯⋯咁我中意吖嘛。」
呂爵安比佢勾起咗好奇心，「咁你中意做記者啲咩？」
柳應廷一臉驚訝，「阿呂大狀，你唔好同我講你唔中意做大狀喎？」
「叫我Edan。」呂爵安特別加重語氣，因為佢遲早係床上會用到，「咁個時我考到嘅分唔係law就medic㗎啦，我又見血暈⋯⋯之後professor話我咁叻駁嘴又話做bar搵到大錢，咁咪考囉。」
「咁其實你en唔enjoy㗎？」
呂爵安靜咗落嚟，平時牙尖嘴利嘅佢竟然唔知答咩好，因為佢好似從來無諗過呢個問題。
食完lunch，兩個人去咗飛髮。呂爵安仲特別提髮型師要剃咗柳應廷啲鬚佢，搞到人好委屈咁細細聲話，我今朝遲咗起身趕時間之嘛⋯⋯
呂爵安內心咆哮一聲，發誓柳應廷再用咁嘅語氣講嘢，佢遲早連自己個層海景新樓都會面不改容咁落佢名。
然後佢望望吓，又覺得呢條友執吓個樣都幾cute吖，都食得落吓嘅。
柳應廷一踏入會場，內心嘅不安就幾何級數咁上升——在場嘅人全部都身光頸靚，唔少仲係新聞頭條嘅常客。呂爵安望住佢嚇到成個僵咗係度，就拉住佢行去擺滿嘢食嘅檯，「驚有人咬你咩，食啲嘢先嘞——Well, well, well. If that’s not the hottest lawyer in town.」
柳應廷抬頭就見到個高大斯文嘅男人向佢哋點頭，「Hello, Edan. And ——」
「呢個係阿Jer，」呂爵安係柳應廷件西裝外套底下攬住佢條腰，「獨立記者。陳律師，我讀law school時嘅roommate，依家都係我好好嘅partner，你想報道個單case都係佢請我做counsel。」
柳應廷有啲唔舒服咁左擰右擰，又睥咗呂爵安一眼，但對方扮睇唔到咁完全無放手嘅打算。
陳律師無咩表情，但聽到「partner」呢個字眼神有些少動搖，「叫我Ian就得。」
柳應廷報上自己間網媒個名，Ian微微笑，「把聲幾好聽。」
雖然第一次見咁樣比人讚有啲奇怪，但柳應廷心底裡都有啲沾沾自喜，正打算答佢你把聲都好好聽，呂爵安突然話：「江sir呢？佢今晚無嚟咩？」
「Anson今晚on duty，我一個人嚟。失陪先。」
呂爵安望住Ian走遠嘅背影，轉身拉住柳應廷嚟到檯邊，「焗薯呢度就無啦，薯仔沙律啱唔啱？」
柳應廷呆呆咁望住兩個人拖住嘅手，衝口而出問：「頭先個嗰你ex嚟？」
佢對感情事一向有種莫名其妙嘅直覺，況且頭先佢哋真係盲嘅都睇得出有路啦。
「吓？唔係呀。」
柳應延忽然get到呂爵安無啦啦帶佢嚟呢度嘅原因，即刻fing開佢隻手，「呃鬼咩，擺明就借我嚟過橋。唔想一個人面對ex就請個ptbf啦，你咁有錢。」
呂爵安𢳂緊薯仔沙律嘅動作停咗落嚟，眼甘甘望住柳應廷，「咩ex？我無ex，亦從來無拍過拖，不嬲都係搞完就算。你問完未？仲長氣過我審犯喎。」
柳應廷突然氣不打一處來，「呂爵安，你問我點解人工咁低都做記者吖嘛，我依家就答你。我做記者係追求真相，唔係好似你咁，乜都要呃呃氹氹。」
「真相？」呂爵安真係忍唔住笑，「你知唔知咩叫真相？同打官司一樣，贏咗個邊講嘅就係真相——」
佢隨口噏咗幾個case，係真相未明個陣已經幫個客打甩咗，庭上根本無人care真相係乜。佢發現柳應廷雖然無乜法律知識，但係咁易同佢講吓佢都get到，又無想像中咁鈍。問題係佢思路根本無邏輯可言，永遠都係感情行先，有時唔知點駁仲會嬲到dump地，一係就大大聲叫人唔好嘈。
呂爵安又好氣又好笑，雖然都係笑佢傻閪多，但佢思維咁跳脫又幾fun吖⋯⋯
兩個人一路傾一路飲，最後兩個人都面紅紅又wing wing哋咁。呂爵安望住柳應廷對迷離眼，係星空下愈哄愈埋，近到佢哋feel到對方呼出嚟嘅空氣。
呂爵安見佢無縮開，就知道佢一定係有feel。佢有信心個晚帶柳應廷返屋企絕對食到佢，但對方好明顯就係無辦法將性同愛分開嘅人嚟，食咗恐怕手尾長。
所以最後呂爵安側頭，係佢耳邊輕輕講咗句：「我call車送你返去嘞，嗯？」
點知柳應廷突然錫咗佢一啖，又急急腳走開。呂爵安比酒精影響思路有少少慢，係朦朧間淨係聽到佢係度笑。佢發現，柳應廷嘅笑聲比佢平時講嘢把聲仲好聽。
「阿大狀，又話幫我call車嘅？」
佢兩個其實唔順路，所以呂爵安本來打算call兩部車，但柳應廷比佢塞咗入車廂之後，竟然對住佢舉高雙手好似細路仔扭抱咁樣。呂爵安鬼使神差咁就上咗車，柳應廷即刻就撓住佢手臂成個挨落佢度。
喂，條仔咁嗲㗎咩？
自從個日之後，呂爵安身邊就多咗個記者成日係度問呢問路。office啲同事背住佢兩個叫柳應廷做「雀仔」，因為佢成日吱吱渣渣但把聲又出奇地悅耳唔煩人，另一個原因當然就係暗指佢係「爵爺嘅仔仔」。
對於咁樣嘅發展呂爵安自己都有啲意外，但係新聞界有個熟人收風真係方便好多，好多時件事未出街佢已經聞風而至擸咗個client返嚟。但同時佢都好小心翼翼，偶爾比啲料柳應廷做獨家報道，又唔可以踩界漏得太多風聲比人針到妨礙司法公正。
佢一直都咁同自己講，佢同柳應廷嘅關係純粹就係互相利用，別無其他。
直到有日佢收到Ian嘅電話，「I heard your little bird got caught.」
「Come again?」
Ian歎咗口氣，「佢涉嫌盜取國家機密比人拉咗。你想我去幫佢保釋定你親自落場？」
呂爵安隔住部手機都聽到佢後半句忍唔住嘅笑意，咬一咬牙咁樣答，「我去。」跟住又忍唔住問：「佢居然打比你都唔打比我？」
「佢好似唔知要搵律師，純粹係我係警署有人。」
呂爵安接連講咗幾句粗口，「下餐我嘅。」
Ian罕有咁大笑兩聲，「下次bonus分大餅啲比我得㗎啦，counsellor。」
最後呂爵安成功說服咗警方drop all charges，兩個人一行出警局，柳應廷就忍唔住嗶哩吧拉一輪嘴咁控訴，「死差佬韞我咁耐餓死人咩，杯咖啡又難飲到嘔，去廁所都要跟住哂正一變態嚟——」
「柳應廷。」
呂爵安第一次連名帶姓嗌佢，嚇到柳應廷即刻收聲，平時連上庭都嬉皮笑臉嘅大狀一臉認真咁睥住佢。
「今次係我最後一次救你，聽到未？我唔得閒三日唔埋兩日就去保釋你。」
唔知幾時開始，柳應廷都沾上咗呂爵安即刻駁嘴嘅習慣，「你知唔知我攞到咩料？官方保密之餘仲要一個大話冚一個大話。我唔會就咁收手，一定會爆哂出嚟，公眾有權知道真相——」
呂爵安就嚟比佢激到爆血管，忙咗成朝佢連lunch都未食，有個好重要嘅client meeting已經miss咗大半，聽朝有份motion要交去法院仲未睇——佢攰到成個人向前挨落柳應廷膊頭度。
呂爵安個人定咗落嚟，先開始feel到全身上下嘅恐懼，心臟砰砰咁跳。
佢今日救到柳應廷，第日都未必幫佢打得甩。
柳應廷邊有見過咁emo嘅呂爵安，有啲不知所措咁棟係原地比佢挨咗陣，試探咁拍咗佢背脊幾吓，然後慢慢伸手攬住佢。
兩個人好罕有咁靜咗落嚟，終於柳應廷半開玩笑咁話：「都估到你唔捨得我踎監㗎啦。」
佢見呂爵安粒聲唔出又眼紅紅咁，心一軟就拖起佢，「行啦我就嚟餓死啦，最多今餐我請嘞，不過就唔好期望有紅酒飲呀大狀。」
呂爵安呆呆咁望住兩個人拖住嘅手，雖然唔忍心但覺得有必要講清楚，「阿Jer。你知道⋯⋯Ian永遠都係我最好嘅partner？」
柳應廷眼甘甘望住佢，「我知。」
佢口係咁講，心底裡其實好鬼憎「partner」呢個字，好想捉住呂爵安膊頭對住佢咆哮：「part乜撚嘢ner？」
呂爵安三歲開始就覺得身邊啲人好蠢，但柳應廷係佢廿幾年嚟見過最蠢嘅人。
無論係感情定工作，佢都係明知不可為而為之。但就係呢個傻閪，令呂爵安第一次有為咗錢以外幫人打官司嘅原因。
呂爵安唔信命運，亦係無神論者。但呢一刻佢竟然覺得慶幸，慶幸當初自己揀咗law school，慶幸當初佢唔想比人睇死，慶幸當初有個好學生roommate拉扯住佢pass到bar。
佢曾經覺得人生好無謂，只係想賺多啲錢享樂。但依家望返轉頭，原來一切都會滙流成河，造就依家呢一刻。
呢一刻，佢個腦比任何時候都清晰。
「喂Jer仔，同我結婚啦。」
「吓？」
柳應廷以為自己先係感情用事唔經大腦個嗰，點諗到會係呂爵安提出閃婚？
「結咗婚到時你真係要坐嘅，都可以conjugal visit吖嘛，驚你掛住我個靚仔樣呀。」
柳應廷一聽啲眼淚已經係咁流，喊到出唔到聲只好不斷咁點頭。
如果有個人覺得你有日會踎監都肯同你結婚，佢諗唔到有咩理由拒絕。
當初柳應延揸起支筆不顧一切咁寫，好多人都話佢痴咗線，估唔到有人仲癲過佢想同佢結婚。
呂爵安由細到大都比人話佢吊兒郎當，佢都無諗過會遇到個人無咁話佢不特止，仲會陪佢一齊癲。
柳應廷望住佢笑，但下一秒就比呂爵安hi咗啲結婚蛋糕落塊面度。
「柳bb你呢排又肥咗，睇吓好啦，唔好食咁多。」
「屌！你唔好嘈啦！我要離婚！」