Chapter Text
話說喺好耐好耐之前，仲未有人界嘅時候，世上就只有天界、獸界同魔界。佢哋各自生活從不干涉對方，大家都安份守己喺自己嘅界域生活，而且壽命亦都很長。
天獸魔界最主要嘅由一個神去觀察佢哋嘅活動，如果有任何一方作出挑釁或搞事，呢位神就會出手將佢逐出三界，非仙非妖非魔咁渡過冇盡頭嘅歲月。
佢就係九天玄女，及後都係因為佢之後嘅一個決定而創造了人界。
「天后，你嘅胎動頻密，應該都係呢幾日嘅事啦。」仙醫郭嘉駿正在為天界嘅最高領導人天后娘娘檢查佢個胎。
事關下一界天使揸fit人⋯唔係⋯主導者即將要出世，天界上下都好緊張迎接呢位新領導者。
「咁有勞駿仙醫呢幾日辛苦你，希望孩子出世後係一個聰明又精乖嘅小朋友，等我唔使太費心咁去教。」天后娘娘苦口婆心咁講。
「娘娘仲為咗上一胎嘅事而憂心？」
「唉，如果嗰陣佢乖乖哋，天界嘅重擔就唔使落咗喺呢個孩子身上⋯⋯」天后嘆了一口氣「我希望佢唔好行差踏錯，再同另外兩界有咩關係。」
最重要嘅係我唔想再生！好撚痛！修身又要嘥好多時間。
天界主要由天使管轄，每100萬年就會有一名女天使被點命成為天后。佢哋嘅天職就係為天界生下一名領導者，當領導者有能力繼承佢嘅責任，天后就會退位落嚟，位列仙班。
而領導者壽命完咗後，上古嘅神仙就會再點名女天使任天后，延續天界嘅香火，事關領導者多數為男性，而且佢哋終生都要係童子之身，因為只有純潔嘅身體先可以擁有最高法力去維持天界嘅安靈。
不過到咗呢位第121位天后任命期間，竟然發生咗意外，佢嘅第一胎天使成長之後，繼位之前竟然愛上咗一位妖獸，仲甘願為咗對方而放棄佢嘅使命，墮入獸界。
天后曾向九天玄女求助，可惜玄女卻表示無能為力，因為呢個孩子所做嘅一切自願，既沒有為三界帶來異樣，亦冇因為佢嘅放棄而為天界帶來災禍，所以⋯反對無效。
「有時本宮都唔明玄女大人諗乜，明明神規就係唔俾三界互相打擾，但偏偏出事嘅時候，佢竟然話無能為力，唉⋯⋯哎呀⋯衰仔做乜踢我？」天后呻緊嘅時候，肚入面嘅孩子踢咗佢一下。
「似乎孩子唔想你憂思太多，哈哈。」郭嘉駿笑笑口咁估緊孩子嘅意思。
三日後，天色突變，山崩地動，整個現象一啲都唔和諧，九天玄女覺得唔對路，於是乎就降臨到天界，睇吓搞乜。
「整乜鬼生個仔都搞到三界唔安寧架？」九天玄女踏住七色彩雲嚟到天宮。
「見過玄女大人。」天宮主管柳應廷出嚟迎接九天玄女「天后娘娘已經胎動咗半日，但孩子都未出嚟，仙醫話呢胎忽然胎盤有異，腳仔出咗嚟先，有啲難搞。」
「唔係嘛⋯逆胎生產？！咁大件事？」九天玄女驚慌得大叫咗出嚟。
「啊！！！！」
「嗚哇～～～～～」
天后慘叫一聲後，隨住而嚟嘅就係一個孩子落地嘅聲音，之不過⋯天色異變更嚴重。
「玄⋯玄女大人。」郭嘉駿冇理自己甩頭甩髻咁喺房度衝出嚟，臉色蒼白咁搵九天玄女。
「咩事臉都青晒！？」九天玄女問。
「大⋯大件事⋯孩⋯孩子佢⋯」郭嘉駿口窒窒咁吞吞吐吐。
九天玄女冇理佢廢噏，一個飛身就飛咗入房，見到天后好虛弱咁瞓喺度，而佢身邊有一個算唔上白淨嘅孩子。
「天后⋯你見點⋯嘩！！！」九天玄女俾孩子嚇到不顧儀容咁大叫咁出嚟。
剛出世嘅孩子算唔上白，雖然口同鼻哥窿大，一啲都冇天使嘅顏值，但側面睇都算靚樣，弊在⋯孩子對翼得一邊正常，另一邊折斷咗。
「玄女大人⋯點算呀？」天后好陰公咁淚汪汪望住九天玄女。
「點解孩子會搞成咁？」九天玄女嬲爆爆咁問。
「因為⋯孩子倒轉咗出世，我唯有掹住佢對腳仔拉佢出嚟，結果⋯⋯唔小心太用力，冇留意佢對翼有一邊撠住咗，跟住就⋯⋯」郭嘉駿跪喺地下戰戰兢兢咁講番事情發生經過。
「仙醫你⋯⋯！！！」九天玄女激到冇氣咁淨係識得指住仙醫，咩都講唔出口，抖咗一陣再講「呢件事本神唔識處理，我會搵盤古大帝傾傾，暫時孩子好好照顧住先。仲有你呀仙醫！你死梗！」
九天玄女講完正想嚟一個華麗轉身離開嘅時候，天后叫住咗佢。
「玄女大人，你可唔可以幫孩子賜名？」
「⋯就叫呂爵安啦，不過佢係折翼嘅天使，我唔保證佢將來可以擔起大任，唉⋯你哋可唔可以生生性性唔好成日俾屎我執！？」
九天玄女走後，郭嘉駿處理好事後功夫，天后便打發所有人退下，一個人坐喺床上，抱住軟綿綿嘅呂爵安哄佢瞓覺。
「安安乖～就算你將來做唔到領導者，你永遠都係我個乖仔，媽媽唔會唔理你，知唔知？」
呂爵安對住天后笑咗一下，個笑容得意到溶咗天后個心，然後乖乖哋飲飽奶就瞓著咗。
呢個時候，邊個會諗到呂爵安之後嘅人生會過得驚天動地又可歌可泣？更估唔到佢對後世嘅人界有莫大嘅貢獻呢⋯⋯