Chapter Text
「Sorry 呀，Jeffrey啱啱調過嚟， 佢唔知你唔方便嚟呢區，戇吓戇吓竟然book咗呢度。」油麻地火鍋店門外，岑珈其一臉抱歉地跟上司說。
「有咩唔方便……黐線。」以往每天最少來回幾遍的街道，驟眼看似一切無改，就連這家火鍋店的霓虹招牌也是忽明忽滅的老模樣，但店子裡由樓面到收銀員已沒一張熟悉臉孔，名副其實的物是人非，然而物是人非的又豈止這家火鍋店，不猶得揪心一陣，呂爵安失笑著又再開口：「喂～我今日無揸車，條新仔飲咗咁多，你送佢返去。」
「Call 咗車喇，兜埋你?」岑珈其收好手機，把重心不穩的Jeffrey扶正便道。
「都唔順路，我去隔離街搭巴士。」
跟同僚瀟灑道別以後，呂爵安漫步在熟悉的小區內，經過了舊居，也經過了往常最愛光顧的茶餐廳，每個門牌每支街燈都讓人難以忘懷，一時間有如夢遊般恍了神，腳步沉重卻未曾停住，然後於不知不覺間，已在區內逛了一圈。
「番薯加湯丸走得！」
老式糖水舖老闆聲如洪鐘的一喊，瞬間把呂爵安的思緒喊了回來，店前拿走外賣的背影面熟得很，可就是怎麼也看不到他的正面。
或許是認錯人吧，那人明明在三年前已經定居台灣，可當看到袖口下的半截天蠍座圖案，懸念馬上消退，不作他想便急步追趕上去。
「生，你幾時返咗嚟？霆霆呢？霆霆有無返嚟？」一把抓住刺青密布的手臂，呂爵安的語速既急也亂。
江𤒹生扭頭過來，呆愣足足兩秒後，毫不猶疑地甩開了故人：「你……你仲好意思嚟呢度！？」
「你答咗我先，霆霆有無同你返嚟？」話猶未了，呂爵安霎眼又緊緊抓住舊友肩膀。
「你煩唔煩呀？無呀！我自己一個人返香港探文哥㗎，就算霆霆有返嚟，佢都唔會見你，我哋成班兄弟都唔會畀你見佢。」江𤒹生猛力一扣一推，冥頑不靈的人隨即跌跌撞撞退開兩步。
「我真係有嘢想同霆霆講，你可唔可以畀佢台灣嘅聯絡我？」有些話，他不甘心沒機會親口說清楚。
「你唔好黐線啦！」以前在拳館切磋時已摸清了他的套路，更何況他從來都不是自己的對手，若然真要打起來的話誰怕誰。
「咁你最起碼都話我知，霆霆佢而家過得好唔好......」這是一個盤繞在枕邊，也陪伴他渡過了不知多少個無眠夜晚的問題。
「你唔再騷擾佢，佢就會好。」
「生......你要幫我睇住佢。」
「你仲扮咩呀?! 我警告你唔好跟住我，陣間畀人見到我同你一齊，我水洗都唔清。」江𤒹生狠狠丟下一句，當即轉身而去，每走三步一回頭，拐了幾個街口，確定沒人追來才安心上樓。
推開了門，江𤒹生的神情語氣和跟呂爵安對峙之時簡直判若兩人：「霆霆，我返嚟喇～買咗蕃薯糖水湯丸畀你食。」
「多謝。」梳化上的人微微一笑，徐徐走到門前，把接過的外賣袋拿到餐枱上，打開膠袋的一刻，清秀眉毛不自覺皺了皺。
「唉......我真係唔小心，係咪倒瀉晒？」明明那個半路殺出的程咬金才是罪魁禍首，只是江𤒹生決意隻字不提。
「唔緊要啦，都仲有半碗。係呢，你啱啱去搵文哥，有無計返啲租金畀佢？」
「文哥一蚊都唔肯收，仲話可以喺度住幾耐都得，但其實天哥嘅骨灰聽日就上位，跟住我哋都即刻返台灣啦。」江𤒹生踢著拖鞋走來，慢慢坐到小餐桌前說。
「生哥哥，我唔想返台灣......想留喺香港。」經過連日來深思熟慮，盧瀚霆終於落下了決定。
「唔得！」黑著臉的人喝令一句。
盧瀚霆扁著委屈但無聲的雙唇，瞳孔反映著鐵窗框的蕭瑟，慢慢擱下湯匙的手卻是如此堅定。
「霆霆，我唔係有心惡你, 不過......」一直以來，就只有這雙如秋水的眸子能讓江𤒹生反思自己的壞脾氣。
「我知你擔心我，但我大個㗎喇，我可以handle 到，如果你唔想搬返香港，我自己一個人都可以。」這些年在台灣打工存了點錢，加上哥哥的保險金，即使一時三刻未能找到工作，也應該足夠在香港生活一段時間。
在台的日子過得平淡，縱然說不上討厭，但心裡對香港的種種始終惦念，只是未知承不承受得了回憶帶來的痛，便一直待在陌生的國度裡療傷，而這一次，若不是為了要把親哥的骨灰帶回香港，他絕不貿然回來。
避走換來的所謂安逸，終究只是一張帶有時效性的鎮痛貼，這次回來，如馬蹄踏過泥沙一樣，難免濺起多少前塵舊事，長存心底的痛如漣漪擴散開去，亦令盧瀚霆意識到逃避並不明智。適當地面對內心悲哀才能根治創傷，這是他在禪修中心打工時所學到的皮毛。
江𤒹生垂下呆愣的臉，當刻盧瀚霆的獨斷和決絕是他從來沒有見過的，原來在一晃眼之間，小伙子長大了，自主了，看來家長管理模式已不適用，惱著眉頭的人喃喃一句：「我點會畀你自己一個人......」
「Ok, 如果你都搬返嚟香港，我哋係咪繼續一齊住？」和江𤒹生一起生活多時，回到香港也照樣同住亦無礙，當是有個伴兒互相照應，或有個室友分擔開支也不錯。
「一齊。」江𤒹生的回話斬釘截鐵。
「咁你想唔想住喺呢度？」
「唔想，我哋再搵過個地方。」
「都啱嘅，文哥唔肯收租，我都唔好意思長住。」
「係囉， 我就係咁諗。」既然無法阻止盧瀚霆回港居住，也至少不能讓他駐留在這一區，剛剛才在附近碰上呂爵安，難保哪天會讓盧瀚霆碰上。
TBC