Work Text:
「啊～～～Jeremy 你快啲抽啦」
「抽嚟做咩啫，次次都話未係時候要耐心等待」
「李駿傑！你快啲抽！」
看着激動得像king kong 般吼叫的盧瀚霆，李駿傑無奈道，「你冷靜啲先，我抽啦吓」，隨手從眼前的塔羅牌堆中抽出兩張翻開。
「喂唔同牌喎，今次真係括弧有希望喎」
「咪嘈啦你呂爵安。」
茶師傅微微一笑，「嗯，呢張牌叫權杖8，象徵 動力、行動與快速達成目標，表示愛情方面的事情會迅速發展，達到預期的結果，即係話你好快就會遇到你嘅真命天子啦。」
一旁的柳應廷忽然爆出一句，「嘩呢張咁多金幣嘅，係咪即係嗰個人會有好多散紙啊？」
「哈！你係咪痴線㗎阿jer」
眾人哄堂大笑，茶師傅托了托鼻梁上的眼鏡，「嗯…我感覺到，你地會因為金錢而認識，而且呢個人仲會幫助你。」
占卜過後，李駿傑獨自一人乘搭平日歸家的巴士，「嘟嘟—」
螢幕上刺眼的紅字顯示着負數，李駿傑才想起剛才乘車去占卜店是已經把八達通的錢用盡了，卻忘了增值。偏偏屋漏兼逢連夜雨，李駿傑把背包翻了個底朝天，也找不到半個硬幣。
「喀啦——」
一隻精瘦有勁的手這時伸了過來，把硬幣投進錢箱裏。李駿傑抬頭一望，只見一個男子正向着他微笑，上翹的貓嘴令李駿傑覺得份外親切，也為男子增添了一份可愛。
「欸？你…」
李駿傑突然覺得這個場景有點熟悉，不會是上次那位…？
「你唔係冇散銀咩？我幫你俾住先囉～」
「欸？又係你啊先生，咁點好意思啊…」李駿傑從錢包拉出一張紙幣，「你會唔會有多啲散銀？一係我同你唱啊。」
「唉…本來仲諗住用啲散銀嚟換其他嘢添～」
可愛男子嘴上歎息着，臉上卻沒有任何惋惜之情，更引起李駿傑的好奇。
「Er…你有嘢想買？一係等陣我跟你落車去唱返啲散銀俾你？」
可愛男子用拇指和食指托着下巴，「如果我話…我係想換你個電話號碼呢？」
「吓？Er、我...」
車廂的燈光忽然大亮，李駿傑感覺自己的臉冒起一陣暖意，不自覺將手遞到嘴邊，想要咬指甲。卻又瞄到可愛男子的眼神，便警醒的把手指收起來，握成拳頭放在嘴邊。
『欸？！咪住！啱啱茶師傅唔通係呢個意思？』
坐在車廂後方的乘客吃着花生，不嫌事大地起鬨，「嘩，咁靚仔又咁有風度，佢唔俾電話你我俾！」
「唔、唔得！」
李駿傑衝口而出，喝止了那個乘客準備衝向可愛男子的企圖。
可愛男子輕笑一聲，「咁你係唔俾得電話我吖？定係佢唔俾得電話我？」
「…你淨係要電話得架啦，唔洗知我叫咩名㗎咩」
可愛男子再次微笑，向李駿傑伸出右手，「唔好意思，唔記得自我介紹，王智德Alton。」
李駿傑連忙用手翹好兩邊垂下的頭髮，抬頭望向王智德，「我係李駿傑，英文名係Jeremy。」
二人相視而笑，李駿傑感覺到，他和王智德即將會有不一樣的故事，正等待着他們。
.
.
.
.
.
.
「咳咳…兩位乘客唔好意思，行車期間騷擾司機有機會觸犯法例」
李駿傑剛想解釋，司機對着王智德抓狂地大喊，「你條仆街溝到仔就死遠啲啦！咪阻住我呢隻單身狗揸車啊！」