Work Text:
「又到新一年啦！今年新年願望就定個『我要出pool』啦！」
大抵如江𤒹生這種長期單身的年輕人總會定下這樣的新年大計。
「你上一年嘅願望又有做到咩⋯⋯」邱傲然吐槽一句後還是給出了建議，「你咁想出pool的話，一係試下去搵月老綁紅線囉。」
「都好喎！」
邱傲然嘆一口氣：「你覆得咁快，其實係咪諗都無諗就覆我？」
「邊有呢？」江𤒹生絕對不會承認這個事實，「我宜家即刻去！」
然後本來行動力滿滿的江𤒹生一抵達黃大仙祠看到那洶湧的人群便立即打消念頭。
他低頭傳訊息給提供建議的邱傲然：「好多人⋯⋯都係唔好搵黃大仙幫手好啦。」
「你點解要揀年初一人哋去搶頭炷香嗰陣先去⋯⋯」回覆是這樣回覆，邱傲然還是有好心給出替代方案，「咁黃大仙嗰邊多人啫，你去另一間咪得囉。」
「咪啦。咁多人去月老度求紅線，佢咁多生意，點可以保證佢一定會幫你？」
「唔係咁點顯得你有誠意先？」這段訊息看得邱傲然滿頭黑線，「唔通搵邱比特咩。」
「係喎！使咩一定要搵東方啲神幫手啫！西方都有㗎嘛！」一句話讓江𤒹生如夢初醒，「佢應該唔會有咁多生意？」
「生咩意⋯⋯你唔係真係諗住咁下話？」對方的奇思妙想讓邱傲然頭又開始痛了，「邱比特出名百厭喎！你確定佢會幫你？」
「佢唔會咁對我嘅！佢同你同姓三分親嘛，你做得我朋友，咁代表我同佢都有親啦係咪先！」
在江𤒹生這種歪理攻勢下，邱傲然覺得自己的頭更痛了。 「先唔講同姓有無三分親，哩個係人哋英文譯名嚟，人哋我都唔係同姓⋯⋯」
他等了一會仍不見對方的回覆。因為江𤒹生的注意力已經完全不在二人的對話上——他已經在求助萬能的Google。
等了好一會，邱傲然才等來江𤒹生的回應：「咪又係差唔多。拜月老同拜邱比特差唔多啫，直接用返拜月老嗰套算。」
「你冷靜啲先⋯⋯」
邱傲然隔着屏幕自然是叫不住去意已決的江𤒹生。他看着網上找到的拜月老攻略，發現不適用的地方不少，乾脆決定自己發揮。
「紅線都無，應該參拜手勢都唔使啦。咁我直接講自己對對方有咩條件好啦，嗯⋯⋯」他不消一會便對着網上搜尋到的邱比特圖片雙手合十，「我要求唔多，最好個人就白白淨淨，有對大長腿，如果個胸可以大啲就最好啦！然後呢我個人就比較多嘢講，對方唔使咁活潑，會靜靜地聽我講嘢就夠㗎啦。嗯⋯⋯一時三刻諗唔到添，就咁多先啦！」
-
計過願以後，江𤒹生的生活嘛——
「近排同之前好似一啲分別都無喎！邱生係咪真係有用㗎？」
邱傲然送上一個冷笑。
「哈。你咁樣許願法，我係個神都唔想幫你啦。」
如果說是和以前沒有絲毫分別，又好像不算太準確。
經過那段亂七八糟的祈願以後，江𤒹生遇上一位陌生男子⋯⋯是他的錯覺嗎？他總覺得面前的男子不住打量自己。
他立即暗自思量自己近日有沒有得罪他人，最後得出並沒有的結論。只是眼前那人一直緊盯着自己，自己也是會害怕的好嗎？
江𤒹生乾脆決定主動出擊：「我哋係咪之前見過？」
那人掃了自己一眼：「都算係嘅。」
「咁我哋做個朋友啦！」江𤒹生沒有多想，甚至還開始為自己的無邊魅力而自傲，「叫我AK得啦！」
眼前那人收回視線，握上了江𤒹生主動伸來的手：「⋯⋯Ian。」
接下來的每一日，江𤒹生發現自己生活每一處都能看見Ian的身影。 又一次瞄到Ian以後，他主動上前打招呼：「又係你喎陳生！」
「我幾時話過我姓陳⋯⋯」Ian回覆的語氣滿是無奈。
「哩個唔係重點！」一回生二回熟，江𤒹生主動提出邀約，「橫掂差唔多到食飯時間，不如我哋一齊食？」
「都得嘅。」
見Ian沒有拒絕，江𤒹生開始沒話找話聊：「又會成日見到你嘅？你住附近？」
「其實有啲遠。」不知為何，江𤒹生總覺得Ian正似笑非笑地望向他，「只係之前從來未俾人搵過嚟幫手，咁近排啱啱好有人搵咪過嚟睇下囉。」
「哦。」
江𤒹生的優點就是他從不多想。一頓飯吃下來，江𤒹生發現二人難得地合拍——
「嘩！你都鍾意ccy哩個歌手呀？我都係喎！」
「⋯⋯嗯。」
「睇你唔出喎！識玩咁多樂器，我本身都想學結他㗎，但係冇咩時間⋯⋯」
江𤒹生本來就是聊着聊着就什麼話都會說出口，不一會他便對着這位見了數面的朋友（？）說起了自己辛苦求姻緣的傷心事。
最後他還不忘點評一句：「個邱比特又會咁冇用嘅。」
Ian的臉色幾番變換，最後簡單地回了一句：「係囉。」
吃完飯以後江𤒹生正準備離開，站起時上衣胸口部分的閃鑽紛紛掉落。
「搞咩點解我件衫會突然甩咁多閃鑽⋯⋯我好鍾意哩件Kyu_i嘅衫㗎⋯⋯」
Ian回答時頭也不抬：「個牌子QC做得差掛。」
直至二人分離之前，江𤒹生還在哀嘆：「唉，哩件限量版嚟⋯⋯」
-
自上次偶然會面後，江𤒹生的姻緣像是有新進展——他有位小學妹主動邀請他去參加音樂會。他興高采烈地趕到場地，在門外枯等卻等不到小學妹現身。
待江𤒹生瞄到趕來的Ian時，江𤒹生已在場外呆等一小時。
「Ian呀！係咪連個天都唔鍾意我！」
「唔係。」Ian回答得斬釘截鐵。
江𤒹生這時候忍不住打了個噴嚏。
「嘩，唔得⋯⋯」他擺了擺手，「吹咗成個鐘頭風，不如我哋入返去室內先再講？」
一進到室內，室內外的溫差大得江𤒹生立即脫下身上的外套。
江𤒹生正想把外套放好時⋯⋯
「咦？」
「嗯？」
江𤒹生疑惑地摸上外套上的洞：「唔知點解件外套後面中間穿咗個細窿⋯⋯好彩我著得夠厚啫！」
「係囉。」
不知為什麼，江𤒹生卻聽出幾分咬牙切齒的意思。
直至聊了一會，後知後覺的他才記得詢問：「你啱啱係咪嬲緊？」
「邊有。」
只是那人的臉色看起來完全不是這回事。
為了讓Ian的臉色有所和緩，江𤒹生用盡所能東拉西扯，聊着聊着Ian突然蹦出一句：「你夏天嗰時就會拍到拖啦。」
江𤒹生狐疑地看向Ian：「你又知？」
「因為你到時件衫會薄啲。」
「吓？」江𤒹生實在沒想到這樣沒有邏輯的說話居然是出自Ian口中，他想了想，思緒突兀地飄到那次沒用的祈願，「可能真係因為西方唔保佑東方？定係我真係去月老度求返條紅線呢？」
「唔使啦。」Ian一反常態地出言阻止，「哩啲你搵西方無用的話，東方都唔會有用啦。」
「又係嘅。」江𤒹生一下子就被說服了。
「又話要學結他？我教你啦。」
「好呀！」
忙不迭答應的江𤒹生自然沒有為意對方轉移話題的技巧是如何生硬。
End.