Chapter Text
情人節一星期前 - 項少龍府邸中
“情人節? 咩嚟㗎?” 廷芳一臉疑惑地問
“我都從來冇聽聞過” 琴清在旁搭嘴
“你哋梗係冇聽過啦 呢個係西方節日嚟 你哋聽過我就真係驚啊” 項少龍一邊吃着雞翼一邊說
“情人節到底係何方神聖呢? 難道... 係一個同愛情有關嘅節日?” 善柔猜想
“啊又比你講中 情人節係西方節日嚟嘅 每年嘅2月14號就係專門比情侶慶祝愛情嘅一日 呢一日通常啲情侶都會互送禮物同埋安排浪漫嘅約會用嚟表達對對方嘅心意 簡單啲嚟講 就係一個比我哋向愛人表示心意嘅特別日子 好多人都會特登揀喺情人節果日表白 浪漫啲啊嗎” 項少龍解釋
“2月14號? 計翻日子... 咪即係一個星期之後?” 三弟荊俊說
“係啊” 項少龍大方承認 “情人節真係可以搞好多嘢出嚟 最啱嗰啲想表白嘅人 好好把握呢個天賜良機 表白實掂啊!” 他望了善柔一眼 “喺情人節表白 都係一個好主意嚟 又有氣氛又咁浪漫 最佳表白日子非佢莫屬啊!”
“真係?” 廷芳在旁邊問
“梗係 大把人喺情人節表白成功㗎”
“如果有人可以喺情人節同我表白就好啦...” 廷芳嘀咕著 看了看坐在身邊的善柔 嘗試去觀察她的反應 可惜甚麼也看不見 只見她喝了一口酒 耳邊泛紅
晚飯過後 - 項少龍府邸外
“項少龍 你提及情人節果陣 何解你會有意無意咁望住我?” 善柔質問
“大佬啊 盲嘅都知你好冧廷芳啦 我比哂 signal 你去表白㗎喇 連啊烏廷芳佢自己都勁細聲話如果有人喺情人節同佢表白就好啊 你唔係咁都唔明啊嗎?” 項少龍輕鬆地說
“咩係 signal 啊?”
“唉 真係成日都唔記得你哋班古裝人唔識聽英文” 項少龍捂面 “eh… 即係我比哂信號你去做嘢咁解囉”
“你想我做咩?”
“大佬 你唔係要我畫公仔畫出腸啊嗎? 有啲嘢 大家心照啦 好心你啦 咁大個人 鐘意嘅咪去追囉 佢又唔係唔受溝 佢都不知幾咁冧你啊!”
“畫公仔畫出腸? 此話何解?”
“唉 你咪理啦 即係有啲嘢唔使講得咁白咁解囉 你唔好同我喺度轉移話題!”
“我幾時有?”
“你而家咪轉緊囉唔好喺度自欺欺人啦” 項少龍走到善柔面前繼續說 “你啊 鐘意人咪講囉 鐘意咪去追囉 有咩問題呢?”
“項少龍! 請你自重 我嘅感情事... 我會自己處理好 唔需要你操心”
“等你自己處理好? 等得你嚟蚊都瞓 蛇都死啦”
“蚊都瞓... 蛇都死... 呢啲說話有何含意?”
“你唔好理咁多啦 我哋而家講緊你明知自己鐘意廷芳你都唔去表白啊”
“我喜歡佢又如何? 佢都唔會接受我” 善柔嘆氣 “自古以來 男女結為夫婦已經成為日常 呢個世界上根本冇人會喜歡自己同自己同性別一樣嘅人 廷芳亦都唔例外” 她帶點悲傷 勉強地笑了一下 “況且... 佢唔係情傾於你咩?”
“我可以話比你聽佢鐘意果個係你唔係我 佢話佢同你相處果段日子係佢人生最開心嘅日子啊”
“此話當真?”
“我呃你做咩呢? 同埋啊 大家咁熟 你鐘意女仔咪鐘意女仔囉 咁大個人唔係恐同啊嗎～”
“恐同... 此話何解?”
“意思係咩唔重要 最重要嘅係你要知道 你鐘意廷芳係冇錯嘅 冇違反自然啊 冇違反果啲咩... 祖先規例嘅 鐘意咪鐘意囉 從來都冇人話過女仔鐘意女仔係有錯” 項少龍落力遊說
“不過...” 善柔依舊愁眉苦臉
“唔好不過啦 你啊 之前係咁鼓勵佢比啲勇氣企翻起身 你而家攞翻小小勇氣出嚟表白 係咪咁都唔得先?”
“我...”
“唔好喺度依依哦哦阿支阿左啦 想做就去做 想追就追 我個年代啊 大把人係同性戀 大把男人鐘意男人 女人鐘意女人㗎”
“我鐘意廷芳... 係冇錯嘅?” 善柔遲疑地說
“梗係冇啦 你啊 連你個暗戀對象都比哂信號你去表白你都唔行動 你就快啲準備吓點樣同佢表白啦 得翻一個禮拜時間 你自己諗吓啦” 項少龍伸了伸懶腰 裝作有點睡意的樣子 轉身準備回府睡覺
“項少龍!” 善柔叫著他
“變個響我全朵!” 他開玩笑地說
“你... 你可否助我一臂之力?” 善柔慢慢地 靦腆地問
“梗係得啦” 項少龍爽快答應 “我叫埋琴清 二弟 三弟 呂姑娘嚟幫你都仲得啊”
“佢哋都會願意幫我?”
“佢哋點解會唔幫你呢? 你之前喺天牢救過我 又救過廷芳咁多次 佢哋對你印象不知幾好 三弟仲話想你多啲嚟同我哋食飯添 琴清都話想同你熟啲”
“真係?” 善柔小心地問
“珍珠都冇咁真啊 信我啦 呢件事係百利而無一害”
“但係... 萬一... 佢拒絕咗我... 咁... 我哋咪連朋友都冇得做?”
“唉 你有呢個顧慮都啱 表白呢啲嘢講咗出口就收唔翻 不過你唔講出嚟就永遠都唔會知道答案 你哋兩個就係冇人夠膽講所以先至會搞到而家咁 明明大家都知道答案 你只係驚關係嘅改變係壞嘅改變而唔係好嘅改變所以一路都唔出聲 加埋你哋啲古代人一個二個都恐同”
“......” 善柔一臉尷尬 一副被項少龍講中了她心中所有顧慮的樣子
“又唔使咁嘅樣 都話咗我會幫你囉 睇你個款你已經有哂計劃 只係唔知實唔實行好 係咪啊?”
“... 何解你會知道我內心思考著啲乜嘢... 莫非你識讀心術?”
“我點會識啊 唉唔好講住啦 都夜啦 你快啲翻去瞓啦 你唔攰我攰呀” 項少龍伸著懶腰 轉身準備回府休息
“... 咁... 我多謝定你先...” 善柔一臉靦腆 “我明日下午再搵你商討計劃細節?”
“隨便你啦 我會喺度㗎喇”
項少龍看著她離去的背影 不禁在心中嘀咕了一句 “女人心其實唔係海底針 之少古代女人唔係呢...”
未完待續...