Work Text:
「喂唔好瞓喇…起身呀…」
依稀聽到自家男友的聲音，Ryan帶著鼻音虛應一聲「嗯」…又睡過去。
「起身呀懶精…今次大檸樂喇…」
Ryan半夢半醒，仍聽到男友的呼喊…腦中迷糊想著：雖則說日有所思夜有所夢，但明明昨晚已抱了他一整晚，還會夢見他聲音，自己也太愛那人了吧…
思及此，Ryan長臂一伸，又想擼擼自家愛人…
一摸卻摸著空氣，人呢？
「我喺度呀，擘大你對眼望清楚！」
男友無奈的聲音近在咫尺，身邊卻是空空的，這種詭異終於喚醒了Ryan，他睜開眼，坐起身，一瞥，完完全全嚇醒了！！
Edan變成了那款追星常見的10cm公仔，正撓著臂對著自己，「肯醒喇咩？！我以為我變成阿貓阿狗你都會繼續瞓添！」
「變成狗狗…都幾好……」Ryan暗忖。
「被你嚇醒晒啦！搞咩？拍港版Toy story？」Ryan說著已拿起公仔Edan，仔細端詳，「係咪偷偷裝咗個Speaker喺入面？」
Ryan說著已研究著公仔Edan的黃色衫，看著那軟綿綿的肚子，又用手搓了搓…
「停…停手！好痕呀！」Edan小短手想推開那大手，當然徒勞無功，也不知是癢、害羞還是甚麼的，那綿質的臉，居然透出點紅。
「仲會臉紅……好得意！」Ryan拿近來看…
「頂你咪哄咁近！我而家終於Get進擊的巨人入面啲人嘅恐懼！」Edan想別開面，但那布料的張力有限，只能僅僅轉了小半臉。
「真係無電喺入面…」
「一定係Nade搞鬼！」/「又係Nade玩嘢啦！」Ryan與Edan異聲同步。(註：Nade在此文為外星生物，能用外星力量弄科幻之事，詳情可參閱本帽另一篇劣作《Bubble》)
「Bingo！我又唻喇！因為Ryan就唻生日，我就提前送份生日禮物畀你啦——」雲朵狀生物彈出來歡快說道：「有無幻想過將最深愛嘅人縮細隨身攜帶呢？機會唻喇Ryan！Nade為你獻上『嘩，娃呀』一日初體驗！等你可以帶住Edan周圍去，係咪好驚喜、好開心呢！」
Edan在望向Ryan又指指Nade，Ryan已默契將Edan放下，Edan便朝這雲朵，用短短的腳踢了一下！
Nade被攻擊，那雲朵凹了進去，「做咩打雲？」
「鬼叫你呢嚿雲次次都搵著我唻搞！」Edan想再伸一腳，但Nade這次醒目避開，更反擊起來，用自己的短腳回踢。
一雲一公仔扭打起來！
這畫面…Ryan忍不住，邊笑邊錄起來。
「你仲有心情拍片？！幫拖呀！」Edan在避過Nade雲朵攻擊的空擋中大叫。
Ryan其實還想看下去的，但看Edan的短手短腳勝算不大，只好一下抓起Nade，「多謝你送呢份禮物畀我，我見到呢個公仔Edan，又摸過佢肚肚，已經好滿足喇，你可唔可以幫佢還原呀？」
「本唻你唔鍾意我就由佢，但佢踢到我咁，凹咗呢一忽都未回彈返…」
「你年紀大，皮膚彈性唔夠呀！」Edan嘲諷道。
「再嘈我唔幫你還原！」Nade氣道。
「Sor 我錯！」/「Sor佢錯！」Edan及Ryan再次同聲認低威。
「初體驗係強制體驗，無得退貨！」
「你咁即係橄粗唻啫？」Edan咬牙道。
「係啦，好似唔係幾好！」Ryan說著，手還是不自覺摸了摸Edan的頭，沒辦法，實在有點可愛。
「你兩個狗男男聽埋雲講先得唔得？初體驗只限一日！你鍾意又好唔鍾意都好，聽日就會變返原型！Okay？唔講喇，我要返去養傷！」Nade說著，如輕輕的一抹雲彩飄走了。
剩下Ryan與Edan一臉一公仔，面面相覷。
「你…咪呀！我咁嘅款，今日只適宜Stay喺屋企直至變返人！」
Ryan卻已重新抓起Edan，抿嘴說：「但…我都想試下你『跟我去返工！』只要你喺其他人面前唔出聲，無人會發現嘅！」
「你返工咪就係健身、練劍，有咩好跟？」
「耶~~~~~求下你，話晒係我嘅生日禮物！」Ryan生硬地撒嬌。
Edan望著某人瞪大那不算大的眼，眸裡盡是期待，嘆口氣，只好點頭…
「唉是但啦！一日咁多。」