Work Text:
豐川sales department一年一度team building，後生仔六角話要今年搞下新意思，懶神秘咁拎咗果個令人聞之色變既死亡行星出黎，在場既男同事都即刻鳩都縮一縮，仆你個街丫比呢舊野中一野真係拆祠堂，金菇都變猴頭菇嫁喎。
「我用死亡行星彈你，你都唔會嬲既，因為我地係一條team黎架嘛！」仲要人講呢句死人台詞真係玩死人，眾人心諗你估大學O camp咩，出到嚟呢個殘酷既社會玩啲咁殘酷既野真係好咩。
當然唔同人有唔同諗法啦，諗緊課長彈我係咪要笑住硬食啦，後輩諗緊前輩受罰係咪要飛身幫佢食，仲有唔少人心入面其實就想睇黑澤出醜既，平時chok曬樣咁冧到班女同事暈陀陀丫拿，等你食幾次死亡行星碌曬地爆粗睇下班女仲有無遐想。
黑澤心諗，你老味好玩唔玩學人玩死亡行星，今次仆街了，六角條死仔真係入世未深，平時sales team大家懶和氣咁其實都有啲人唔gur佢個個月爆數，佢極速思考緊自己嗰六舊腹肌係捉住六角彈返轉頭之前可以頂到幾多野，課長就肯定會就住度力啦唔怕，但係平時緊追自己個幾個同事就肯定出盡奶力想彈鳩死自己既，如果彈中袋袋既話可唔可以忍到痛保持表情呢，安達係度望住點都唔可以失威架嘛。
黑澤望住個死亡行星掛住諗呢諗路，完全無發現安達好擔心咁望住佢。
安達知道黑澤好忍得，應該話太忍得。明明自己返工對客出完trip返黎攰到眼都擘唔大都可以笑住幫自己手OT，鍾意自己可以忍足七年，對住幾西既客同埋同事都可以笑笑口咁四兩撥千斤咁耍走佢地，陪自己食完個勁辣拉麵食到劏先知原來連癱仔實小辣都食唔到。
周圍一陣陣起哄聲太嘈聽唔清楚，只係見到隔離team同事笑騎騎咁扯到條橡筋行一行跟住放手
「唔會，我地一條team......呀、嚟架嘛。」已經唔知第三定四次聽到黑澤姿姿悠悠咁答，雖然睇落黑澤好似平時咁保持住得體既笑容，硬食咗幾野都好似無事咁，安達見到佢耳仔都紅晒，件恤衫比啲冷汗浸濕咗啲就知佢應該彈到好痛。呢個前輩都算仆街，人地都未答完就放手，黑澤都只係好畀面細細聲咁嗌咗出嚟，安達聽係心入面就好似黑澤個肚同細佬感受到既痛咁。
個MC見到黑澤就比班狼死既同事玩死咁，彈多幾野真係怕要當場call白車，接收到課長凌厲嘅視線即刻衝出黎救場
「拿，而家有一個機會比你可以搵個幫手幫你食最後一野既，黑澤你會搵邊個呀？」
痛到仆街踎係地下回緊氣黑澤心諗機會嚟啦飛雲，死仔包都玩得我謝啦，今次仲唔彈到你變八角！
「哎呀梗係我得力助手六......」
忍無可忍既安達二話不說就衝咗去黑澤前面拆咗佢副野落黎戴咗上自己條腰度。
「等、等等我黎！同期點可以唔幫呢，我地department係」
「一條心架嘛。」佢擰轉面望一望黑澤，越講就越細聲。佢應該唔好淆底早啲出黎救黑澤既，睇吓佢而家痛到眼水都標埋咁。
「真係好痛架，唔好啦，聽話。比六角嚟，」黑澤攬住安達條腰想幫佢除返條腰帶落落黎，但係安達捉住咗佢對手唔比佢除，就變左好似黑澤幫佢護住個肚咁嘅姿勢。
「你好痛架我知，聽話啦，我只係幫你食一野姐。」
黑澤覺得，如果唔係成條team兼老細係齊度，佢真係會而家就咀安達一啖。
「我嚟架啦喎，三！二！一！嗚呀對唔住呀大佬！」
本身六角諗住大佬都炳得佢多今次公器私用下，點知平時笑口噬噬既前輩們狼死到無人性玩到大佬標曬冷汗，最後安達前輩重要衝出黎英雄救美咁，六角見住大佬雙手放係安達前輩個肚度目露兇光要殺人咁嘅款，唔講仲以為安達前輩係咪有左添呀......丫唔係點會呢，大佬同安達大佬真係好錫我呀，為左保護六角我唔洗硬食死亡行星兩個一齊保護我真係好幸福呀～
於是六角太騰雞都係唔小心大大力彈咗出去既，雖然已經隔著黑澤隻手安達都係覺得有啲痛，安達諗，六角今次唔好話appraisal比黑澤寫衰，命都唔知有冇呀。
※彩蛋1
藤崎返到埋位坐低仲係覺得宇宙大爆炸咁，頭先黑澤同安達玩死亡行星嗰個世紀一攬，真係仲經典過鐵達尼，遲啲公司月報出左相肯定要用金框鑲起佢。估唔到平時怕醜達竟然咁勇，重要肯比男友攬實一齊硬食死亡行星真係sweet到嘔電。
「頭先黑澤攬住C hing真係型到嘔呀，如果係攬住我幾好呢。」
「唔好傻啦，唔記得之前黑澤reject reception條港女果陣話佢有鍾意既人啦咩，冇行啦你～」
「車～無得食J下都好丫」
幾個港女同事仲吱吱喳渣咁討論緊當時既經典一刻，藤崎望下兩個人嘅空位再同安達隔離既田中姐姐交換咗個「唉你地唔明架啦」互相意會既眼神，再次陰陰咀笑投入返係工作入面。
※彩蛋2
「嘶～清清呀細力啲啦，好痛呀......」
「而家識痛啦咩，頭先仲係度死撐。」完場之後安達就拎定急救箱同問浦部前輩借咗支獅子油，book咗間會議室就掹咗黑澤入去檢查下佢既傷勢。
「一課班仆街真係唔係人咁品架喎，咁唔畀面搞到你咁樣，唔記得平時爆數唔洗追qouta係靠邊個咩」揭起黑澤件衫，隔著恤衫同背心都比死亡行星打到瘀咗幾大撻，平時脾氣好唔多講人壞話既安達都忍唔住一路搽藥一路爆粗鬧人，黑澤聽住男友大爆氣，又諗起頭先安達飛撲埋黎救自己即刻覺得今日就算比人打一身真係抵到爛，個心到而家仲係飄飄然咁。
「佢地都係想睇我出醜啫，清清你咁搏擔心死我啦。」
「......就係見你死頂我先擔心囉好唔好。」
「醜我唔怕，但係我唔想係清清面前樣衰丫嘛。」
「優一呀，我幾時話過會嫌棄你啫。」
活血化瘀既獅子油真係好臭，安達真係捽得好大力好撚痛，黑澤諗起佢櫃桶其實有支喜X妥，因為安達好論盡成日撞到枱角凳腳所以預備定黎搽佢隻豆腐腳既。但係望住安達垂低頭揖高衫袖條呔塞咗入袋，專注咁幫佢搽藥個樣，背窗既光線令到佢身後籠罩住一層光暈，飛舞嘅塵埃好似係佢身上灑落金粉咁，成個畫面好神聖，神聖到黑澤呢一刻乜嘢都諗唔到淨係想偎前錫佢個天使一啖。