Work Text:
各位觀眾！又嚟到一年一度嘅情人節公司女同事收花實況報道啦！
唔知今年營業一課定二課會率先入球呢，成個office嘅女同事都虎視眈眈咁望實個門口，中女師奶氣定神閒咁，睇黎唔分上下半場總之有入球就個c6今晚唔洗跪玻璃啦，
中間兩個青年軍一返到嚟就係咁篤手機又走去toilet講電話唔知係催花店定催自己條仔快啲送花，
藤崎小姐不嬲都話自己唔鍾意花覺得送花好嘥錢，自己有仔都唔會叫佢送喎(眾同事表示聽住先)
某男同事個電話搭正九點就響起，條女河東獅吼話隔離同事早過佢收花大聲到隔條巷都聽到，大家都默默咁聽住佢打去花店催送貨，真係要寫個慘字比佢。
「喂，安達～送咗花比你條女未呀～打去花店問追下幾點送到好喎，遲左俾人扭耳仔呀下。」浦部前輩神神秘秘咁挨埋安達度同佢咬耳仔，
「咩呀送咩呀我都冇女......er話時話你送咗俾你老婆未。」安達心諗其實佢果個係仔，答自己無女都唔算講大話丫，浦部前輩又係既，唔知點解估到佢同公司啲人拍拖成日想旁敲側擊係邊個，有幾次比佢煩到差啲就爆響口叫佢擰轉面望下就見到添。
「一早送到啦～由美全office第一個收花不知幾開心呀，好彩加多咗tips咋～」老婆奴前輩講起太座就眉飛色舞，安達hea應佢幾句就擰返轉頭繼續做野。
「叮咚～」門口有人撳鐘，個個選手都即刻停曬手，唔知邊個率先搶閘呢！
「唔好意思，送果籃嚟架～」唓，原來中空寶，有人鬆一口氣又有人發出失望既聲音既時候，黑澤笑笑口咁起身接咗個果籃擺係pantry度，秘書姐姐心諗個supplier又係既，好揀唔揀揀新十五撞情人節先黎送果籃？！
擾攘一輪嚟到九點半，睇吓個戰況先，今年兩邊竟然仲係0:0，樓下個靚女reception已經收到第三扎花啦，呢邊廿幾歲嘅admin軍團已經咬晒手巾仔打晒催魂call，終於呢個時侯門口響起咗希望既門鐘聲—
「唔好意思呀，邊位安達小姐呀麻煩簽簽收丫」
速遞哥仔拎住一大扎紅玫瑰，目測都幾十支，仲有張燙金咭仔係上面添。
「安達小姐既話應該上17樓先啱喎。」
「唔係喎，張單寫住送俾10樓安達清喎，冇呢個人？」
「佢行開咗，同埋佢係安達先生黎......」
班同事你眼望我眼，二課個毒男安達喎？今年第一個搶閘收花不突止，重要有人送花比男人？咁大扎玫瑰睇落都起碼千千聲，唔通係送上黎自己陣間送俾條女？應該去toilet嗌佢收花定點好？
大家既衝擊又一頭霧水之際，拎埋袋準備出街見客既黑澤已經順便簽收埋扎花擺咗係安達個位度。
上半場開波半個鐘就破蛋，營業二課既安達選手率先入波，係一比零呀！兩隊球員球證同觀眾都呆撚咗，情人節全女班賽事破蛋既竟然係個男人......咁嘅賽果真係無人估到。
安達做完每日爆石任務返到office果陣淨係見到全office同事都圍住佢個位吱吱喳渣唔知做咩。
「安達呀～竟然有人送花比你呀！」
「安達～收工送俾條女呀，睇你唔出咁浪漫咁揼本喎。」
「頭先黑澤幫你簽收擺係你枱頭，佢真係好好人～見到佢拎住咁大扎花真係好charm呀係送俾我就好啦」
「醒下啦黑澤前年情人節收客花都試過呀幾時輪到送俾你丫唔好ff啦。」
「有送呀佢拆咗扎花分比全office丫嘛唔記得咩。」
呆咗嘅安達望住扎咁誇張既花唔知講咩好谷到塊面紅曬，班同事逗多佢兩逗只係覺得佢怕醜就散水。佢有冇聽錯，頭先黑澤襯佢去爆石幫佢簽收擺埋位，啲時間有冇較得咁準呀，重要四舍五入即係係全office面前送花比自己而且係全層第一個收花，但係又做到大家唔會懷疑同激親女同事......黑澤份人真係會搵盡任何一個機會宣示主權，咁諗落竟然覺得有啲可愛。
屌我係咪傻撚咗呀，安達雙手拍一拍自己個面豬躉，陣間收工點拎住呢扎野行係街度啫。
『黑澤出左去見客叫我提你記得望下張咭仔，仲有晏晝叫你print份野添※』捧住扎花唔知點算好果陣，電話彈咗個message，安達抬頭淨係見到藤崎對佢笑咗笑。
"I’d always pick you. love you.Y”
手寫既字體，一睇就知係黑澤手字嚟。
趁同事未黎八卦，安達偷睇咗張咭一眼就紅都面曬，掹張咭落黎攝咗落心口袋度，用手掩住佢個卜卜跳既心臟仔，緊張得黎又有啲甜，仲有八個鐘先收工，今日唔知點先捱到收工呢。
