Work Text:
20XX年7月13日
今日去咗樓下間花店見工，老細好靚仔…
佢好似對我份cv好滿意，即場就請咗我做暑期工
好開心呀終於可以有錢養仔仔喇
係呀我就係嗰啲月薪三千養月薪三十萬嘅人…
20XX年7月14日
今日第一日翻工，老細請咗我lunch食肉醬意粉！
啊，老細真係好靚仔
佢隻貓都好得意，仲識講「唔好」
第一日翻工就學咗好多嘢，好開心
但係其實衰啲講句，呢間鋪個客流量好似唔請人老細自己一個都搞得掂喎…
.
.
.
20XX年7月16日
琴日Day off之後今日第一日翻全日
我終於知道點解老細要請人
唉，原來係老細男朋友嫌冇時間拍拖
唉，點解佢男朋友都咁靚仔，仲好大隻
真係符合嗰個「所有靚仔唔係有女朋友就係有男朋友嘅定律」
甜甜的愛情甚麼時候會輪到我( ߹ㅁ߹) ᒡᑉᒡᑉᐧᐧᐧ
.
.
.
20XX年7月21日
今日翻工嗰陣老細同佢男朋友都喺鋪頭
佢哋好似當我唔存在咁…
我…我要申請太陽眼鏡翻工用
老細男朋友當著我面餵老細食糖水啊
我去完廁所出嚟嗰陣仲聽到老細問佢男朋友糖水定佢甜啲啊
喂呀
其實我碗豆腐花都唔係落咗好多糖啫
點解咁甜㗎
我係咪要變腐女喇
20XX年7月22日
今日老細男朋友冇嚟過，今日對眼冇俾人閃親
老細話我做嘢上手得好快，奬我每個禮拜可以帶一札花翻屋企
嗯咁我梗係揀我最鍾意嘅桔梗花啦
成札都係紫色桔梗真係好靚
仲係自己親手包㗎𠻹
老細問我點解鍾意桔梗
因為桔梗花語係高貴同尊嚴，我都要用咁嘅態度生活啊
.
.
.
20XX年8月1日
今日我未入到鋪頭，喺窗度已經見到佢哋兩個錫緊…
嗯，我都唔知入唔入去好喇
一於喺出面等一陣等佢哋錫完先啦
五分鐘
佢哋錫咗
五分鐘
再唔入去打卡部機要計我遲到
唔得啊我要拎勤工獎，多幾舊水俾我買碟啊
我唯有衝入去啦
哈哈
真係好，尷，尬！！！！！！！！
老細塊面紅曬，然後趕走咗佢男朋友
即係呢我未翻工已經咁衝擊
叫我點樣做嘢喎(;´༎ຶД༎ຶ`)
雖然
睇兩個靚仔錫錫係好開心嘅
但係
請唔好阻住我拎我嘅勤工獎please
.
.
.
20XX年8月20日
懷疑係上次俾我見到佢哋錫錫
靚仔老細怕醜得濟
呢兩個禮拜老細男朋友都冇出現過
不過我就知老細會去對面gym room搵佢喇
夜晚都有出去食飯拍拖
又留底我一個
好彩仲有Nana陪我
老細話Nana痴我仲多過痴佢
梗係啦你成日痴著對面Gym Room條龍
今日又係咁啦
男朋友生日所以全日都唔喺鋪頭
淨係朝早見到佢抬著超大扎花上咗人地架車
唉，都係嗰句
甜甜的愛情甚麼時候輪到我
20XX年8月21日
原本今日我淨係要翻上晝更嘅
但係突然之間變咗翻全日啊
又有加班費拎
爽啊
不過今日晏晝見唔到老細都有啲驚
打電話俾佢竟然係佢男朋友接電話
話佢瞓到而家
好難得㗎嘛，平時老細都好早起身等啲花材嚟
但係諗深一層
琴日人地男朋友生日啊，佢哋會做啲咩啊，佢哋可以做啲咩啊
兩個血氣方剛嘅男人共處一室可以做啲咩啊！
哎呀我估我聽日都係要翻全日㗎啦
20XX年8月22日
哈哈今日竟然唔使翻全日
下晝老細就俾佢男朋友送咗翻嚟
唉，條頸度勁大個咖哩雞
都係嘅夏天冇理由著樽領㗎嘛
作為一個成熟嘅人類我梗係冇講乜嘢啦
但係你地可唔可以唔好喺我面前打車輪？
20XX年8月23日
我懷疑琴日老細男朋友見到我冇好大反應以為我留意唔到舊咖哩雞
今日老細條頸多咗兩噠
.
.
.
20XX年9月1日
其實份暑期工contract只係到今日
但係老細話佢好鍾意我，做嘢夠爽手又做得好
決定繼續請我做part time
好開心啊可以繼續近距離睇靚仔錫錫
啊啊啊啊唔係
係可以繼續賺錢養仔仔✅
.
.
.
20XX年9月8日
今日老細生日，有一日俾我見到佢電話wallpaper係unicorn
我買咗隻unicorn公仔諗住送俾佢
點知我全日都冇見過佢
不過其實都預咗㗎啦
我應該聽日後日都唔會見到佢
好彩呢兩日冇堂啫
.
.
.
20XX年9月10日
終於見到老細
送咗unicorn公仔俾佢
佢好開心咁攬咗我一下
我人生第一次俾靚仔攬啊啊啊啊啊
不過老細今日步姿有啲奇怪
有冇做得咁激烈，生日咋喎，咁你地聖誕啊、情人節啊嗰啲點算
係咪要我成個禮拜都見唔到靚仔老細😭
.
.
.
20XX年9月16日
今日花店正式接受外賣訂單
好型
不過買花唔係要親自揀先夠誠意咩？
老細話可能有啲人冇得親自嚟揀，但係送花嘅心意係真嘅就得
嗯嗯，呢個就係part time員工同老細嘅差距嗎？
.
.
.
20XX年10月10日
其實都翻咗咁耐工
我對佢哋嘅sweet sweet已經免疫
雖然睇到都仲係會陰陰嘴笑
但係起碼對眼冇事，都未有糖尿病
哈哈邊個估到甜蜜如老細同佢男朋友都會鬧交
嚇死我啊今日一翻到去見到老細眼腫腫
即刻問佢咩事啦
原來係因為呷醋，話佢男朋友喺gym room識咗個新嘅學員女仔，嗰個女仔成日dm佢撩佢傾計佢男朋友又唔識拒絕
我問佢有冇同佢傾過
佢話有，但係男朋友只係覺得係做gym上嘅討論冇乜嘢
救命，直男到呢
老細話佢其實知佢地兩個都係鍾意男仔嘅就唔應該咁呷醋
傻嘅，咁樣梗係要呷啦
老細等咗全日等佢男朋友嚟氹翻佢
結果冇嚟過
橫掂我聽日冇堂，我同老細講不如佢聽日抖吓，我翻全日都ok
唉，希望佢地快啲好翻啦
我仲想睇靚仔錫錫
20XX年10月11日
今日翻咗工冇耐就見到老細男朋友喺出面裝吓裝吓
我就同佢講今日老細應該唔會翻嚟
佢長嘆一口氣之後問我知唔知咩事
我話知嘅…老細有同我講囉
佢話佢琴晚sip（？）高個枕頭諗過之後覺得自己真係過份咗，已經掉咗個女仔俾第二個教練，block埋佢
我心諗其實唔使sip高個枕頭啦就咁諗都知有問題啦？不過真係有實質行動係幾好嘅
佢又話而家想嚟整札花送俾老細
估下佢揀咗咩？
桔梗啊
估唔到我最愛嘅花竟然會變成佢地和好嘅信物
點算以後見到桔梗都會諗起佢地鬧交啦
不過都好嘅…
桔梗花都有everlasting love嘅花語
幾啱而家嘅佢地
今日教完老細男朋友整花之後就冇佢地有冇好翻嘅消息了
希望佢地有好翻啦！
.
.
.
20XX年10月13日
琴日全日都要上堂冇翻工
更加唔敢就咁問佢地有冇好翻，好似太八掛咁
今日翻去就見到老細坐喺佢男朋友大髀上面俾佢攬住
好囉，啱啱好翻就想閃盲我
不過都係咁樣嘅佢地好啲
.
.
.
20XX年10月23日
今日老細鬼鬼鼠鼠咁話要俾嘢我睇
控埋去佢部電話度睇
嘩情趣內衣嚟嘅？？？
雖然你係靚仔老闆啫都唔可以性騷擾我㗎？？？
喺我咁諗嗰陣佢問我覺得邊套襯佢，要買嚟Halloween著俾Stanley睇
好囉…
好囉…
狐狸嗰套囉…
原來我不知不覺已經成為老細嘅好gay蜜啦？
.
.
.
20XX年10月31日
因為我今日夜晚都約咗人
老細夜晚又要拍拖拖
所以今日花店索性淨係開半晝
喺度估下我要幾多日先可以見翻老闆
我估3日
.
.
.
20XX年11月3日
真係3日哈哈哈哈
我係預言家！！
.
.
.
20XX年12月23日
估唔到原來花店喺聖誕呢啲大時大節會唔開
（其實係因為老細要去日本旅行我又唔肯放假翻咁多工
老細同佢男朋友送咗聖誕禮物俾我！！
係水晶球，入面有隻雪人
好得意，已經放咗喺我台頭
佢地仲話回喺日本帶好嘢食翻嚟俾我
好開心！！
.
.
.
20XX年1月3日
老細帶咗超級多朱古力、曲奇餅同蜜糖蛋糕翻嚟俾我！！
啊點解我會有個咁靚仔又咁好人嘅老細㗎ಥ_ಥ
然後，今日老細拎好高嗰個架嗰啲嘢嗰陣我見到佢條腰
全部
都係
咖
喱
雞
再認真啲望佢條頸？
都有好多
不過老細應該好努力咁搵遮瑕膏遮過
其實你地去日本係咪晚晚住情趣酒店？
.
.
.
20XX年2月14日
其實做花店就預咗情人節忙嘅
我都預咗老細會出去拍拖嘅
但係今朝翻到去見到佢喺度真係嚇親
我仲問佢點解唔去拍拖
佢話怕我自己一個搞唔掂
仲知我冇男朋友專登買朱古力請我食
嗚嗚嗚嗚嗚咁好嘅老細邊度搵
所以下晝佢男朋友嚟搵佢嘅時候
我直接推咗佢出門口
「快啲去拍拖啦！我搞得掂㗎」
喺我再三嘅保證之下老細終於放心跟咗佢男朋友走
啊 結果我忙到夜晚十一點花店先有得閂門
我強力建議老細去拍拖然後開OT真係唔係為咗賺加班費，都真係唔係因為冇人陪我過情人節㗎…
咁老細話佢哋上年情人節已經冇出去拍拖…我又點捨得一對佳人俾工作拆散呢？
.
.
.
20XX年5月20日
老細同佢男朋友終於拉埋天窗了
今日去左觀禮
果然著西裝嘅男人係會靚仔一萬倍
老細同佢男朋友原本已經咁靚仔
著完西裝靚到我就算知佢地係gay都想沉
嗯今日老細個花球係我整嘅
好開心
佢竟然會咁信我
喺佢花店打咗咁耐工 整得最認真嘅花就係今次
最後呢個花球又喺翻我隻手度
老細冇拋到花球
佢話想直接送俾我 祝我快啲搵到男朋友喎
哈哈都幾好笑
我睇住老細佢地sweet sweet咗四年
我就四年都未有男朋友
傾緊計嗰陣佢男啊唔係係老公行咗過嚟
話要介紹佢gym room啲靚仔俾我識
我講笑咁話有冇你地老婆咁靚㗎先？
佢即刻攬住老細走開咗
嚇死我
原來係即刻即場搵咗個教練俾我
仲要企佢喺老細隔離問我夠唔夠靚，唔夠再搵
但係呢
唔知係咪追得星多，或者睇呢兩個靚仔睇得太多啦
好似冇人夠佢地靚喎
唉，是但啦
其實今日睇住佢地咁幸福
我都好幸福啦
我都係繼續做我嘅腐女同fans
唔好出去禍害其他人好啲