Chapter Text
雨由凌晨一直落到依家，好似要將成個西環淹沒咁，冇停過。
西環半山，一棟老式洋樓，樓齡過六十年，外牆嗰層米色油漆早已甩皮甩骨，露出一塊塊濕漉漉、發咗霉嘅灰色石屎，好似一張衰老又病態嘅面孔。
鐵閘外拉起咗冷冰冰嘅藍白色封鎖線，幾架警車靜靜哋泊喺路邊，紅藍交替嘅閃燈映喺牆壁上，一閃一閃喺呢個陰暗嘅雨夜入面。
Edan 呂爵安推門落車，佢著住件深灰色風褸，內襯黑色長袖，額前幾缕髮線被雨水淋濕，黏喺皮膚上。
佢冇理，任由冷冰冰嘅雨絲沿住顴骨滑落，滲入領口。
佢只是轉動手指數次交疊間嘅車匙——啪，啪
金屬碰撞嘅清脆聲，混喺淅淅瀝瀝嘅雨聲入面。
「Edan，現場喺三樓。」
Ian 踩住水坑跑過嚟，一手拎住對講機，面色有些少難看。雨水順住佢嘅髮際流落頸，佢連抹都顧唔上。
「報案嘅係管理員根叔，住喺地下，佢話三樓A室傳出陣陣臭味，已經整整兩日但業主陳伯話，佢個仔陳柏言兩日前明明仲同佢通關電話……」
「陳柏言。」Edan 嘴唇微微一動，喃喃唸咗一遍呢個名。
聲音一出口，就被冷冽嘅雨聲吞咗一半。
Ian 點點頭，眼神有些許唏噓：「青年鋼琴家，二十八歲，去年喺維港音樂廳開過獨奏會，喺圈子裏面算係有點名氣。根叔話佢平時好少出門口，成日一個人匿喺屋企練琴，估唔到……」
「吸毒？」
「現場睇落好似係。針筒、錫紙、膠吸管，全擺喺茶几上面。」
Edan 冇出聲，佢靜靜哋望住眼前呢片漫天雨幕。
一個光鮮亮麗嘅青年鋼琴家，二十八歲，正值最好嘅年華，喺自己嘅屋企。
吸毒過量死亡，聽落，真係正常到不得了。
但 Edan 做刑警做咗整整八年。八年嚟，死人見得太多，佢學到最深刻嘅一件事，呢個世界上面，最合理嘅答案，往往就係最荒謬嘅假象。
因為真正嘅凶手，永遠會竭盡所能，將死人嘅現場佈置得「天衣無縫」。
佢抬眼望咗一眼洋樓嘅大門，鐵門半掩，門縫透出嚟嘅昏黃燈光，暗淡得令人心慌。
佢邁步行入大堂，穿過嗰條貼住暗花牆紙嘅狹窄長廊。牆紙早已泛黃剝落，上面嘅花紋磨損到幾乎睇唔出原貌。空氣入面彌漫住一股濃重嘅霉味，仲夾雜住某種說不清、道不明嘅甜膩死氣。
一步，一步，行上三樓。
硬底皮鞋踩喺舊式花地磚上面，發出沉悶又孤寂嘅回聲。
每一步，都好似踩喺某個經已停止跳動嘅心臟上面。
三樓A室，門半開。
仲未入去，門縫就擠出一股令人反胃嘅氣味，唔係普通嘅腐臭，而係一種甜到發膩、混雜住消毒水味道嘅腐敗初期氣味——一種只要你聞過一次，呢一生都刻喺骨髓入面、永遠忘唔掉嘅味道。
Edan 伸手推開門，舊木門嘅門鉸發出「吱呀——」一聲刺耳嘅尖叫。
客廳好大，大得有點空曠，一個靠教琴維生嘅年輕人，住得起咁大嘅客廳？
但入面嘅傢俬少得可憐。一張舊梳化、一張茶几、一個書架。
牆上挂住幾幅抽象畫，角落頭孤零零咁企住一部黑色立式鋼琴——琴蓋嚴絲合縫咁合埋住。
Edan 行近少少，見到琴蓋上面覆蓋住一層薄薄嘅灰塵，好耐冇人彈過。
一個以琴為命嘅鋼琴家，竟然唔彈琴，太唔尋常。
屋入面好暗。窗簾拉得密不透光，只有角落一盞小枱燈孤零零咁亮住，散發住微弱又昏黃嘅光只夠照亮客廳嘅一小角，其餘嘅地方，全部沉淪喺漆黑嘅陰影入面。
死者就咁坐喺梳化上面。
陳柏言，男，二十八歲。
身形消瘦，面色灰青，嘴唇呈現出一種詭異嘅深紫色。
佢嘅頭微微傾側，表情竟然奇跡般咁平靜，好似只係喺一個漫長嘅下午瞓着咁，但佢永遠都醒唔返嚟，佢已經死咗，喺呢個冰冷嘅屋企，孤零零咁死咗至少兩日。
茶几上面擺住幾支用完嘅針筒、一卷錫紙、幾條膠吸管，仲有一隻翻倒咗嘅玻璃瓶，殘留住少少透明嘅液體。
一切都太完美，太順理成章，一個不堪壓力或者沉淪毒海嘅吸毒者，喺自己屋企過量死亡。
最典型、最無可可疑嘅場景，典型到好似一場精心排練過無數次嘅舞台劇。
「睇落……真係好似吸毒過量死亡。」Ian 行到佢身邊，聲音壓得極低，彷彿怕驚醒咗梳化上面嘅人。
Edan 冇即刻回答，佢慢慢走入客廳。
佢唔係嗰種例行公事式嘅巡視，佢嘅眼神係嗰種全神貫注睇實嗰一種，佢每一步都踩得極慢，眼神冷冷咁掃過房間嘅每一個死角。
突然，佢停落嚟「等等。」
佢緩緩踎低身，喺茶几同梳化之間嘅深色地毯上面，有一小塊顏色明顯深咗少少嘅區域。邊緣位置有輕微嘅褪色痕跡，好似被人用力擦拭過。
Edan 伸出戴住白色手套嘅手指，輕輕觸碰咗一下嗰塊地毯，濕嘅。
仲帶住一絲「有漂白水嘅味。」佢聲音極低，卻帶著一股冷意。
Ian 愣咗一下：「吓？漂白水？」
Edan 冇理佢，只係凝視住手套指尖上殘留嘅微濕，漂白水。
有人喺陳柏言死咗之後，特意用漂白水清理過呢度嘅地毯。
目的好簡單——抹走唔應該出現嘅痕跡，但佢哋始終抹唔乾淨。
呢種「抹唔乾淨」，要麼係因為當時時間太緊迫、心情太慌亂；要麼係因為——佢哋自以為已經做得到無懈可擊。
呢個世界上從來冇完美嘅凶手，凶手之所以能得逞，只係賭警察「唔夠細心」。
Edan 慢慢企起身，目光再一次掃視成個客廳，但呢一次，佢睇嘅不再係眼前呢些「擺喺表面」嘅證物。
佢睇嘅係——到底有啲咩地方「唔協調」，佢一步步行去玄關，望向門口嘅小鞋櫃。
鞋櫃上面放住一串屋企鎖匙，同埋一個銀色嘅小碟——碟入面有幾枚硬幣，排得整整齊齊，但最邊嗰枚，微微歪咗少少。
好似曾經被人慌亂間掂過，然後有人試圖將佢擺返原位，可惜，擺得唔夠完美。
「陳柏言係左撓定右撓？」Edan 突如其來咁問。
Ian 眨咗眨眼，連忙翻查紀錄：「吓？我問過報案嘅根叔……等陣，根叔話陳柏言彈琴同寫字都係用右手。」
「右手。」Edan 輕聲重複，點咗點頭。
佢轉身行返去茶几前面，居高臨下咁望住隻翻倒嘅玻璃樽，樽身太乾淨。
「如果佢係自己毒癮發作吸毒，點解隻手會乾淨成咁，針筒同玻璃樽上面，應該佈滿佢自己急促、出汗甚至發抖嘅指紋，長期吸毒嘅人，臨死前嘅生理反應騙唔到人，金屬同玻璃表面一定會留落極重嘅痕跡。」
「但呢度乾淨得過份，乾淨到好似有人事後戴住手套，精心幫佢整理過後事咁。」
Ian 嘅面色瞬間變得極其凝重：「即係話……呢度根本……」
「我暫時冇講係謀殺。」Edan 冷冷咁打斷佢，「但呢個現場，絕對唔係咩狗屁意外。」
佢最後望咗一眼梳化上嘅死者。
陳柏言嘅雙眼半閉半合？瞳孔雖然早已散大失去光彩，但眼球凝視嘅角度，好似喺臨死嘅那一刻，仲死死咁盯住角落裏面嘅某樣嘢。
Edan 順住死者最後嘅視線望過去，對面牆上，挂住一幅巨大嘅裝飾畫，1米2 x 80cm
係一幅色彩極其濃烈嘅抽象畫，鮮血般嘅紅色同深邃嘅黑色塊互相交錯，隱隱約約好似一張喺絕望中扭曲、尖叫嘅面孔。
畫框微微歪咗？向左傾斜咗大約五度，一幅掛喺牆上好久、用嚟裝飾嘅畫，點解會莫名其妙咁歪咗？
除非有人喺慌亂之中掂過佢，或者——有人曾經迫切咁從畫框後面，拎走咗啲咩重要嘅嘢。
Edan 靜靜咁企喺嗰幅畫前面，盯着嗰幅畫，睇咗好耐。
佢嘅腦海入面，無數碎片開始瘋狂組合，一個才華橫溢卻深居簡出嘅年輕人，孤獨咁死喺屋企，地毯上有漂白水擦拭過嘅濕痕。
茶几上嘅毒品道具排列得太過「完美」，而死者死不瞑目嘅視線——永遠停留喺呢幅歪咗嘅畫上面。
所有嘅碎片，仲未完全拼湊出一張完整嘅圖畫，但真相嘅方向，已經呼之欲出，呢度冇意外，呢度，只有一場精心佈置嘅「演出」。
有人想用最卑劣嘅手段，掩蓋呢度發生過嘅罪惡。
「Ak。」Edan 轉過身，對住後面趕到嘅技術科人員講，聲音冷得冇一絲溫度，「成個現場，由頭到尾，每一吋地毯、每一件物件。影相、取樣、指紋、DNA，哪怕係一條頭髮，都唔好漏。」
Ak 重重咁點頭，立刻帶住團隊著手佈置封鎖線與採樣工具。
Edan 轉身行出走廊，喺門口停低咗腳步，佢再次回過頭，最後望咗一眼客廳深處嗰幅裝飾畫。
紅色與黑色嘅色塊喺昏暗嘅陰影入面，好似一個無聲嘅冤魂，正對住佢發出哀嚎？佢拿出手機，撥通咗一個熟悉嘅號碼。
「法醫科？我係呂爵安。陳柏言嘅屍體，最快幾時可以安排解剖？」
對面傳嚟幾句簡短嘅回應「好。聽日上午一早。我會親自派人過去跟。」
佢掛斷電話，抬頭望向門外滂沱嘅雨幕。
「Ian。」
「咩事 ？」
「幫我將陳柏言呢個人，由頭到腳徹底查一次。佢嘅交友圈子、過節敵人、財務狀況、感情糾紛……所有嘢，我全部都要，我要清楚知道佢喺過去呢一年入面，見過邊個、去過邊度、講過啲咩，甚至係連佢食過啲咩，我都要知道。」
Ian 沉聲應咗句「明白」，轉身快步離去。
Edan 一個人企喺走廊盡頭，雨水順住風褸嘅下擺不斷滴落，喺佢腳邊累積咗一小灘積水。
佢低頭望住嗰灘水，水面倒影出天花板上那盞閃爍不定嘅舊燈。
一閃一閃，像極咗死者最後嘅眼神。
「陳柏言。」佢用只有自己聽得到嘅聲線，低聲自言自語，「你到底……喺呢度等咗幾多日？」
冇人回答佢，回應佢嘅，只有窗外永無止境嘅雨聲。