Work Text:
一個天朗氣清的早上，江𤒹生精神爽利回到街市。
「早晨啦各位兄弟～」
一入門口，迎接他的卻是九個已經換好裝束但不知為着何事圍在一起神情嚴肅的哥弟，以及一陣異常沉重的氣氛。
圈子中間坐着了兩個人。
「文哥，阿嫂。」
「阿生。」
瞥見楊樂文女友雙眼通紅受盡委屈的可憐模樣，還有楊樂文眉頭深鎖但仍擠出樂觀笑容溫柔安慰她的舉動，江𤒹生撞了撞最近自己的王智德手肘小聲問道「咩事啊？」
「阿嫂俾茶樓逼跑數，話9月前如果賣唔到至少200盒月餅就即刻豉椒炒魷喎。」
「咁仆街？」
楊樂文與女友相戀多年，感情一直非常要好，雖未簽一紙婚書但早已視對方為終生伴侶，一眾「自己友」對她也十分尊敬尊重，而她亦很懂得人情世故，不時打包酒樓的貴價點心給他們作下午茶，又會在他們有長輩生日需要以中餐賀壽時以知客特權提供半價優惠，盡顯一個嫂子的大方得體，因此今次她和平日最照顧大家的楊樂文遇上困難，檔主們也想盡辦法落力為他們提供協助。
「文哥已經一個人哽哂嗰200盒月餅㗎喇，咁我地自己圍內每人幫佢要啲，再睇吓點樣幫佢散咗批貨啦。」
所有人點頭同意。
「月餅呀⋯好味啊⋯我幫佢食哂佢吖～」
「細姜你short咗呀？大嗱嗱200盒喎，最少有成800個㗎，食哂佢你想未夠廿五歲就中風兼糖尿呀？」
「咁不如放喺我餅舖轉賣俾啲街坊啦。」
「呢個有得諗。」
「但係要柳餅一個人食哂800個又好似好唔人道⋯一係咁啦，柳餅你接四份一批貨，其餘四份三我地九個人平分放啲喺檔口賣，應該好快清得晒。」
所有人表示贊成。
楊樂文感激不盡。
「多謝哂你地，我前世梗係唔知做過咩好事，今世可以遇到你地呢班兄弟⋯」
「傻啦文哥，你同阿嫂平時咁睇我地，我地知恩圖報啫。」
「係囉，三個臭皮匠勝過一個諸葛亮，我地呢度三個有突添啦，無嘢攪佢唔掂嘅！」
「啱聽。」
「多謝，嗰四份三批貨你地預埋我吖，每人15盒，其餘嗰啲就辛苦柳餅你喇。」
「唔辛苦，賣餅我最耍家。」
一星期後，200盒月餅如期送到，鏡邨街市正式開始為期十天的「齊來慶中秋」銷售活動。
「大隻德，秤斤莧菜嚟吖。」
「好呃，陳師奶呀，加唔加四十蚊買個月餅啊？雙蛋白蓮蓉嚟㗎，煮金銀蛋莧菜唔駛買咸蛋之餘仲有蓮蓉月餅食，係咪好正先？」
「龍師傅，我屋企個廁所水箱漏水啊，上門整一次幾錢啊？」
「維修費二百，散件另計，月餅四十蚊個百二蚊一盒。」
「月餅？愛嚟塞住個漏水位嘎？」
「唔係，順手賣埋啫，你鍾意食又得送俾親戚朋友又得，要唔要吖？」
「細佬，整支孖蒸嚟。」
「嗱，孖蒸，阿叔呀，要唔要買啲月餅餸酒？四十蚊個百二蚊盒。」
「餸酒？哈哈～我幾廿年嚟都係空肚飲，飲到純哂囉～」
「哦，咁要唔要買個月餅罐返去裝嘢？十蚊個。」
每戶檔主都以自家檔口的經營手法兜售着手頭上以真金白銀買來的月餅存貨，務求能以最短的時間賺回最高的成本，不過當中亦有一個視上班如消遣的有錢仔大方將自己的月餅精心改造成另類美食，與一眾兄弟手足分甘同味。
「喂～埋嚟埋嚟有嘢食～」
中午休市，江𤒹生利用新休息室裏的氣炸鍋製作出十件香噴噴的特色小食分發眾人。
「嘩！咩咁香啊？」
「係西多士啊～」
「正！食完飯啱啱想食啲甜嘢。」
「嚟，一人一件，小心熱啊。」
「唔～好好食啊～」
「係喎，啲餡由花生醬轉咗用月餅啲蓮蓉同咸蛋黃，口味好特別好新鮮啊～」
「豬兜果然夠哂賢淑。」
「生哥呀，可摸以麻煩你幫我整多件啊？我想俾BB試吓⋯」
「一早整咗喇，放咗喺氣炸鍋入面，一陣佢過嚟你攞俾佢食啦。」
「多謝生哥！」
「阿生，其實你駛乜打魯暉工做豬肉佬啫，開間餐廳自己做老闆都得啦。」
「欸，做老闆多嘢煩吖嘛，打工就唔同呢，收入穩定又無拘無束，每晚拍吓籮柚走人不知幾咁舒服。」
「你每晚趷高個籮柚，我包你仲舒哇啊！」
江𤒹生出盡全力扭陳卓賢大腿令他收口。
自從街市多了個檔主休息室後，盧瀚霆到訪街市的次數與時間明顯比以前多了和長了。
「豬豬～」
「BB～」
望見休假前來探班的戀人，呂爵安大步上前用力一攬將他整個直抱起來轉了一個圈。
「咁早過嚟嘅？尋晚瞓得好唔好啊？」
「嗯！豬豬你睇，個燈籠靚唔靚啊？」
盧瀚霆興高采烈向男友展示手中一個拳頭般大小的迷你小豬電燈籠。
「嘩～好靚喎～喺邊度買㗎？」100分男友自然做出他最想要的反應，哄得盧瀚霆眉開眼笑「喺街口間文具舖咋嘛，見佢幾得意咪諗住買返去放喺白白雪雪滑滑嘟嘟個魚缸側邊，等佢地都應吓節囉。」
「唔？乜媽咪咁體貼班魚仔咁抵錫嘅咩⋯錫啖先啦⋯」
「嗯⋯」
「咳—唔—！！」
差一分便吻上的兩人被咳聲一嚇猛然抬頭，隨即對上蹲在自家店前抽煙的邱士縉隱藏在煙霧中的火爆眼神。
屌你老味，今朝我先同條女嘈完，你兩條死𡃁仔夠膽喺我面前曬恩愛？信唔信我攞啲哥士的溶Q咗你兩個吖嗱？
讀穿邱士縉的內心想法，冷汗直下的呂爵安緩緩放低尷尬膽怯的盧瀚霆「⋯BB啊，生哥整咗好嘢食啊，你都有份㗎，我帶你過去食吖。」接着一手拉着盧瀚霆匆匆走進休息室，成功避過邱士縉的眼神追殺
一對小情人又一次共歷患難。
「巨龍哥好得人驚啊⋯」
「佢今朝俾龍嫂剷嚟所以燥底啲啫，無事唔驚唔驚⋯」
親親摸摸安撫好軟糯的戀人，呂爵安讓他坐在檔主們午睡用的公家尼龍床上，打開氣炸鍋將熱烘烘的西多士用抹手紙盛着餵給盧瀚霆品嚐。
「唔～好好食啊～月餅味咁得意嘅？」
「係啊，生哥用佢嗰份月餅整㗎。」
早早聽呂爵安提過月餅的事，盧瀚霆語帶關心問道「你地啲月餅賣成點啊？駛唔駛我幫手？我可以叫公司啲同事幫手買啲㗎。」
面對盧瀚霆的體貼窩心，呂爵安深感溫暖，他輕撫上戀人的臉溫柔說道「乖B仔喇，但俗語都有話禍不及妻兒，我唔會要你幫我孭半邊數㗎，我一個人頂得㗎喇，不過今年就要委屈吓你同auntie用酒樓月餅代替雪糕月餅嚟過節囉。」
被愛郎強大的男友力護着，盧瀚霆微微搖頭然後幸福一笑「你送咩俾我同媽咪都咁鍾意，最緊要份心。」
呂爵安親了親他的手背。
「係呢，你有無諗住攞盒月餅返屋企俾小如豬佢地食啊？」
「有啊，反正咁多盒喺度，攞盒俾佢地又攞幾盒俾啲親戚囉。」
「係咁，我俾返一盒錢你，你俾佢地嗰盒當係我買俾uncle auntie同小如豬嘅中秋節禮物吖。」
叫他不用擔心戀人依然堅持為自己着想，呂爵安心下感動不已「BB⋯你真係好⋯」
「傻豬嚟㗎，你咁錫我，我梗要錫返唔⋯」
終歸按捺不住的呂爵安一口含上乖巧可愛的豐軟紅唇，忘情吸納對方的香甜氣息，如願跟最愛親在一起的盧瀚霆也投懷送抱積極回應男友的疼愛。
二人如膠似漆情意綿綿之際，一把怨恨聲音打斷了他們好事。
「喂！攪嘢返屋企攪吖唔該！街尾係咁街頭又係咁！GV片場咩而家屌你四個！」
聞言隨即彈開的兩人再次尷尬上線，向對方伸舌苦笑。
餵完多士依偎了片刻，呂爵安便神采飛揚回到魚檔迎接下午時段去，而今天除了見男友就再沒其他節目的盧瀚霆則留在魚檔對面的店巷遊手好閑左逛右逛。
經過休息室旁邊第一間店舖，盧瀚霆探頭進去跟裏面的店主親切問好。
「Hello，傑少。」
正在檀木桌上畫着什麼的李駿傑循聲抬頭對他友善一笑「喂，Anson，咁錯蕩啊，入嚟坐吖。」
顧看店內香火繚繞的莊嚴景象，盧瀚霆喚了聲「打攪晒」才恭恭敬敬輕步走去。
「今日放假呀？」
「係啊，衰人老闆逼清假囉。」
「無所謂啦，見少佢一日咪仲好，飲唔飲嘢啊？有茶有汽水。」
「汽水吖唔該。」
在李駿傑離座打開由神枱櫃改裝而成的雪櫃拿取汽水時，盧瀚霆好奇偷望了他留在桌面的紙稿，驚喜問若「嘩，傑少，乜原來你副業係fashion designer嚟嘎？啲衫好靚啊～」
遞了罐冰凍汽水給盧瀚霆的李駿傑坐回原位微笑答若「唔係，呢啲紙紮設計圖嚟咋嘛，乜你都有留意fashion嘅咩？啱喇，俾啲意見大家交流下吖。」
紙紮？！
聞之色變的盧瀚霆本想立刻耍手搖頭拒絕對方，但聽見李駿傑豁然一句「係人都會死㗎啦，有乜好驚啫？」後又覺得不無道理，遂放下成見跟對方交流心得。
「我覺得呢度如果轉用黃色個對比感好似大啲，同埋如果襟口位可以加返個圖案，整體感覺應該會更加立體。」
他的意見令李駿傑充分流露出對他的欣賞。
「老闆唔該！」
「嚟！」李駿傑揚聲應話後對盧瀚霆輕說一聲「你等我一陣。」之後便到門前招呼着一對年輕夫婦
「要啲咩？」
「想要份中秋拜神衣紙。」
「ok。」
李駿傑抓抓弄弄熟練地配出一套齊全的香燭紙寶遞給顧客，並朗朗上口教導他們如何使用。
「十五嗰晚七至九點，開張摺枱放喺屋企對住月亮個窗前面，放個香爐插對紅燭燒柱香，擺齊月餅、芋頭、菱角、花生、楊桃、碌柚做供品，記得唔好放肉啊，之後雙手合十向天拜三拜，跟住一邊化寶一邊誠心默禱，祈求萬事順遂，闔家平安。」
顯然對傳統習俗毫不熟識的兩個人立即點頭受教。
收錢前李駿傑指了指手邊的月餅存貨「要唔要埋拜神月餅？四十蚊個百二蚊一盒。」
年輕夫婦大眼盯小眼用口型討論片刻，似乎沒什麼幫襯的打算。
此時，率直的盧瀚霆隨心一句「四十蚊個咁平？出面閒閒哋賣緊六十蚊個個喎！」
經第三者從旁一說，原本準備付錢走人的夫婦出奇地瞬間認同起盧瀚霆說的話，馬上回心轉意對李駿傑說「咁我地要兩個啦。」
「吓？」難以置信的李駿傑與盧瀚霆互望了一眼「啊⋯多謝，百三蚊啦咁。」
盧瀚霆也暗自詫異。
乜我講嘢咁有牙力嘅咩？我姓盧唔係姓朱個喎⋯
靈機一觸，盧瀚霆想到一個既可打發時間又有建設性的有趣玩意。
放學時間，幾個中學生圍在「姜記荳品」店前。
「飲豆漿定食豆花好呢？」
「食乜鬼豆花吖，都唔飽肚嘅，去麥當勞食個餐好過啦～」
從「李傑記香莊」步出的盧瀚霆適時竄到學生們側邊「老闆唔該！一個1號餐一個2號餐！」
他的下單即時吸引起學生們的注意。
「咦？乜有餐嘅咩？」
「老闆，1號餐同2號餐係咩嚟㗎？」
「吓？」腦袋除了吃就只有吃吃吃吃的姜濤一時間應對不了無所適從
1號餐同2號餐係咩嚟？我都想知啊！
「1號餐同2號餐都唔知係咩？乜你咁背㗎？」一臉得意的盧瀚霆對學生洋洋說着「1號餐即係月餅配豆漿，2號餐即係月餅配豆花，兩個餐加埋一百蚊都唔駛，好味又飽肚，好過食埋哂啲熱氣嘢啦。」
聞言幾個中學生中了邪般連連點頭，之後爭相向姜濤下單。
「老闆！1號餐唔該！」
「我要2號！」
「我都要2號！」
回過神來的姜濤馬上招呼客人，得逞的盧瀚霆對他單了單眼後悄悄退場。
離開「姜記荳品」，盧瀚霆走向鄰舖的「伊人花店」八卦窺探。
端坐店內專心插花的陳卓賢餘光瞅到他的身影，伸手招他進來。
「做咩四圍行啊？賣魚仔唔得閒陪你咩？」
「佢要看檔吖嘛，咁你知我又⋯」
跟其他人一樣對盧瀚霆忌諱心照不宣的陳卓賢微微點頭「喺度坐吓囉，全街市最乾淨我呢檔。」之後低頭繼續專注花藝
無所事事的盧瀚霆坐在對面不時幫他遞遞剪刀傳傳花枝，其間不經意瞄到疊在盆栽旁邊的十數盒月餅。
「花仔哥呀，你啲月餅郁都無郁過嘅？啲客唔肯買呀？」
陳卓賢瞥了月餅一眼，輕嘆一口「鬼咩，我呢度賣花㗎嘛，要食都唔會走嚟我呢度買啦。」
「咁又係，你仲要係街尾最後一檔，想買一早幫襯哂前面啲檔啦⋯」說着，定睛於眼前花圈的盧瀚霆突然計上心頭「咦？花仔哥，呢啲係咪做白事嗰啲花圈嚟㗎？」
「係啊，嗰邊一排都係，晏啲車去大酒店收錢。」
「不如你每個花圈都放個月餅入去，寓意先人親屬苦中一點甜吖？」
盧瀚霆的提議一秒令陳卓賢露出驚喜表情「又俾你講得通喎，驚魚仔，即刻幫我攞十個月餅出嚟！」
「知道！」
在「伊人花店」當了半小時助手小義工，盧瀚霆懷着愉快的心情步出店門。
經過「文記粥舖」，一把聲音把盧瀚霆叫住。
「Anson。」
「啊，文哥。」
「食唔食煎堆啊？啱啱炸起㗎。」盧瀚霆還未回答，楊樂文已將圓圓的煎堆夾扁剪半遞到他指端「嗱，小心焫啊。」
「多謝文哥。」
咬了一口外脆內軟的煎堆，盧瀚霆溢起心滿意足的笑容「唔～好好食～」
見他吃得津津有味的樣子，正在吃粥的食客不禁饞涎欲滴也想品嚐一下。
「老闆！加個煎堆！」
「呢度都要！」
「嚟多個添！」
「收哂！」驚奇不已的楊樂文看了眼盧瀚霆後端送着食物，機靈的盧瀚霆馬上再拿起油器櫃裏切成四份一楷的月餅小啃一口「唔～呢個仲好食～又香又甜餸粥一流！」
霎時間點菜聲此起彼落忙得楊樂文不可開交，分身不暇的他只能以一記感謝的眼神目送盧瀚霆離開。
步近「柳柳餅店」，盧瀚霆瞧見一臉焦急的柳應廷在店內坐立不安，遂上前關心對方。
「柳餅，咩事乸口乸面啊？你紋腸痧呀？」
「唉，唔係啊，街口間老人院囉，之前同我要咗50個月餅話中秋party送俾啲公公婆婆做禮物，叫我禮拜五晚收工送過去俾佢地，啱啱一個電話打嚟話個party改咗期叫我而家即刻攞俾佢喎，我開緊舖㗎嘛邊度行得開啫？」
盧瀚霆睨見身旁一個寫着「老人院」三個大字的巨型紙皮箱，問柳應廷「呢箱呀？」
「係囉。」
打量過箱子的體積與重量，盧瀚霆主動開口「我諗我應該搬得到嘅，一係我幫你送去老人院吖～」
「唔好！」柳應廷先是斷然拒絕又立即放軟解釋「點可以要你做搬運工嘅呢？唔得唔得～」
俾賣魚安知道我仲有命嘅？！
「咁點啊？」
「啊，一係咁吖，你留低幫我看一陣舖，我即刻跑去老人院送貨，好無？」
「吓？又要看舖呀？」
上次幫呂爵安看檔的惡夢依然瀝瀝在目的盧瀚霆浮現出不太願意的神情，見狀柳應廷連忙正言鼓勵。
「欸，放心喎，魚檔啲魚生勾勾你都賣到，我啲麵包死㗎嘛，你無理由攪唔掂嘅。」
「咁又係⋯好啦！」
就這樣，盧瀚霆又充當起「柳柳餅店」的廿分鐘店員。
「鈴鈴⋯」櫃面的固網電話冷不防響起
「喂，柳柳餅店。」
「你好啊，我地係陽光幼稚園打嚟㗎，想同你訂返每月一次幫小朋友慶祝生日嘅大蛋糕。」
「哦，好呃。」
拿起紙筆抄好所有資料，掛線前盧瀚霆膽粗粗向對方主動推銷「老師呀，買唔買啲月餅俾小朋友食吓啊？好平啊而家，做緊四十蚊個咋。」
待柳應廷從老人院折返餅店，電話底下除了壓住一張幼稚園每月一次的固定訂單，還多出一張購買了50個月餅的額外發票。
離開餅舖，對戶陳瑞輝的聲音馬上傳入盧瀚霆的耳中。
「靚姐，而家買8424可以用優惠價四十蚊換隻雙黃白蓮蓉喎，要唔要整返隻返去中和吓西瓜啲寒氣啊？」
「唔啦，幾廿歲人廢事食咁多甜嘢啊。」
「幾廿歲人？靚姐你唔好玩我啦，你頂多咪大我兩三年～」
「唓，你玩我就真啦，我個女就大你兩三年！」
盧瀚霆無聲無息混入顧客堆中假裝買橙。
「老闆呀，乜淨係買西瓜先有月餅換買橙無嘎？我都想換返個啊，我阿嫲好鍾意食呢隻月餅㗎，話貪佢唔甜個黃又漏油喎⋯」
望見盧瀚霆的容貌，機智的陳瑞輝立刻順着他演下去「啊⋯欸，原本就無㗎嘞，不過見你咁孝順⋯俾你換啦吓。」
「真嘅？！多謝老闆！係咁我要夠一盒會唔會有得平啊？」
「有，百二蚊，買三送一。」
正所謂「瘦田無人耕，耕開有人爭」，在香港人習慣人有我有最愛優惠又最怕吃虧的心態影響下，幾個原本對月餅毫無興趣的果客紛紛向陳瑞輝討取着數，包括最先跟他買西瓜的那名婦人。
「生果仔呀，我都係換一個啦，我都好多年無食過月餅喇。」
「喂，生果仔，頭先你話買橙都有係咪聽者有份先？嗱，我幫你買咗咁多年橙，你唔係唔換埋俾我啊？」
「生果仔，我買兩磅車厘子仲貴過買個西瓜同買袋橙啦，無理由佢地有我無個喎。」
「得得得，個個都有得換，至緊要你地開心！」
果客們只顧纏着陳瑞輝換領月餅，並沒留意事件的始作俑者已靜靜閃到隔壁的肉檔去。
目空一切的江𤒹生對盧瀚霆沒轍一笑「咁都俾你諗得到，真係服咗你。」
「哼，駛乜講。」自信滿滿的盧瀚霆用姆指掃了掃鼻尖，而後回復謙卑說道「生哥呀，多謝你件西多士，好好食啊。」
「唔駛客氣，借花敬佛啫。」
「係咁，遲吓你會唔會再研製啲新月餅菜式出嚟啊？例如月餅蒸豬肉之類？」
「月餅蒸豬肉？！」剛走近肉檔的一名主婦驚訝問道「咩嚟㗎？Fusion嘢嚟嘎？咸定甜㗎？」
見對方饒有興趣的樣子，盧瀚霆馬上又發揮他胡址的本領「哦，好似梅菜蒸豬肉咁咋嘛，甜甜地，簡單易整小朋友又鍾意食。」
深信不疑的媽媽級客人繼續追問請教「係咁有無話特別要用邊隻月餅整㗎？」
「我無特別揀喎，淨係用豬肉江賣嗰隻嚟整咋。」
「豬肉江，乜你有賣月餅嘅咩？」
「啊⋯有，應吓節吖嘛。」
「咩應節啊？」兩三個剛來到肉檔光顧的顧客好奇問道「豬肉江你又有新菜式介紹呀？」
「係啊。」盧瀚霆搶先回話「個月餅蒸豬肉其實都係豬肉江教我整㗎咋嘛，詳情你地問返佢啦～」
突破豬肉檔的緊迫人鏈，鬆一口氣的盧瀚霆正想回到親親男友身邊，抬眼一望卻發現「安記魚檔」經已烏燈黑火。
咦？熄哂燈嘅？豬豬呢？
迷惘之際，一把熟悉的聲音從遠處響起。
「BB～你喺邊啊～」
聽到呂爵安的呼喚，盧瀚霆立馬高聲回應「我喺度啊～」之後快步走向聲源位置
已經卸下裝束穿着便服的呂爵安正正站在街市出口，拿着被他遺留在休息室的小豬燈籠與滿手食材向他揮手。
盧瀚霆全速衝前一秒撲上。
「哎喲～撞死我喇臭B仔～」
「嘻嘻～點解你咁快收得工嘅？」
「哦，就咁嘅，聽講我個又乖又叻嘅老婆成個下晝周圍幫我班兄弟做媒賣月餅，班兄弟飲水思源咪係咁指哂啲客過嚟買魚掃哂啲貨囉。」
自己的「豐功偉績」被男友知道，盧瀚霆羞澀一笑。
「好喇，攞返個燈籠啦，今日我地早啲煮飯仔，食完同你去市中心行街街。」
「嗯！」
徐徐升起準備與太陽換更的皎潔月亮，隱隱照耀着這個溫情洋溢的街市。
彩蛋
「喂～生猛海鮮～埋嚟睇埋嚟揀～」
「老闆唔該。」
「係，哥仔要咩？」
「想要舊鯇魚。」
「鯇魚呀？賣哂囉喎，要第二樣得唔得啊？你愛嚟蒸定炆？」
「我愛嚟煲湯㗎，蕃茄豆腐魚湯。」
「哦～唔駛買鯇魚，買紅衫啦，平啲煲出嚟啲湯又鮮甜啲，你幾多人飲吖？」
「兩個。」
「咁呢兜啦，廿蚊，夠兩個人每人兩碗㗎喇。」
「係咪都係咁煲㗎咋？我唔係好識⋯」
「都係咁煲㗎咋，嗱，我同你去淨哂啲鱗同鰓，你返去沖多次水用廚房紙印一印，落啲油落兩片薑煎香啲魚兩邊，之後攞壺滾水淥落去，放埋其他湯料冚蓋中火煲半個鐘再落鹽調味就得㗎喇。」
聽了呂爵安簡潔清晰的講解，一點就明的年輕男子微笑致謝「好，唔該哂你。」
「唔駛，哥仔呀，買咗月餅未啊？整唔整返盒？」
「月餅？魚肉做嘎？」
「唔係，雙黃白蓮蓉嚟啫，四十蚊個百二蚊盒，幾好食㗎。」
「嗯，等我問吓我老婆先。」
「好呃。」
年輕男子即席掏出手機致電伴侶。
「喂，霆霆呀，你食唔食傳統月餅啊？」
完